Уый уыдзæн юбилейон аз – 50 азы галуан куы байгом, уæдæй, стæй 100 азы Республикæ Цæгат Ирыстоны равзæрдæй. Цалцæггæнæн куыстытæм бавнæлдтой фарон фæззæджы
Сывæллæтты сфæлдыстады республикон галуаны егъау рацарæзт кæронмæ фæуыдзæн иннæ аз сентябры. Уый уыдзæн юбилейон аз – 50 азы галуан куы байгом, уæдæй, стæй 100 азы Республикæ Цæгат Ирыстоны равзæрдæй. Цалцæггæнæн куыстытæм бавнæлдтой фарон фæззæджы. Фыццаг къæпхæны куыстытæ кæронмæ фæхæццæ кæнынц. Дыккаг къæпхæны куыстытæ райдайынæн хъуыд уæлæмхасæн æхца. Республикæйы сæргълæууæг Сергей Меняйлойы хæслæвæрдмæ гæсгæ фæрæзтæ радих кодтой. Бæлвырддæр радзурдзæн Хъайтмазты Дзерассæ.
Цалцæггæнæн куыстытæ кæронмæ фæхæццæ кæнынц. Бæстыхайы сæр сæвæрдтой. Афтæмæй лыггонд æрцыд, бирæ азты дæргъы цы фарста тыхсын кодта, уый. Æвæрынц хъарм алюмини рудзгуытæ, раздæры хуызæгтæм гæсгæ сног кодтой æмæ сцæттæ кодтой хъæдын дуæрттæ. Æххæстæй сæвæрдтой мидæггаг коммуникацитæ. Бындурон цалцæджы рæстæг хыгъд æрцыдысты зынгсирвæзтыты æдасдзинады домæнтæ.
Дыккаг къæпхæнмæ гæсгæ лыстæгдæр аивгонд æрцæудзысты мидæггаг агъуыстытæ. Куыстыты номхыгъд чысыл нæу. Хъæуы реставраци скæнын разуындтæ,сцалцæг кæнын æддаг хызтæ, базилын мидæггаг кæртмæ. Ногдзауты галуаны бирæ азты истори зæрдыл лæууын кæндзысты нывтимæ æвгтæ, паркет. Къултыл баззайдзæн мозаика, сæйраг фойейы пъолыл та йæ фæнд кæнынц сæвæрын.
Галуан цыма удæгас организм у, уый хуызæн. Кæд инженерон коммуникацитæ сты туджы системæ, уæд зæрдæ та – бæстыхайы вентиляцион камерæ. Сты цыппар.
Сывæллæтты сфæлдыстады республикон галуан сси дыккаг хæдзар 7 мин сывæллонæн. Реконструкцийы рæстæгмæ сфæлдыстадон къордтæ апырх сты республикæйы ахуыргæнæндæтты. Бындурон цалцæджы куыстытæ æххæстгонд цæуынц галуаны æмæ культурон намысы цыртдзæвæнтæ хъахъхъæныны комитеты минæвæрттимæ æнгом æмархайдгæнгæйæ.
Хъусдард цæуы иннæ къордты фæндонтæм дæр. Тренерты курдиатмæ гæсгæ гимнастикæйы залы сисдзысты цар, сæвæрдзысты айдæнтæ. Ныр та уал спортсменкæтæ архайынц пединституты бæстыхайы. Елена Майорова аивадон гимнастикæйы фыццаг къахдзæфтæ скодта Ногдзауты галуаны. 2006-æм азы йæхæдæг райдыдта сывæллæтты ахуыр кæнын. Уыцы рæстæгмæ йæ статус аивта, фæлæ æнæивгæ баззад галуан йæхæдæг. Уымæ гæсгæ Еленæйæн йæ хъуыдытæ баст сты йæ уарзон бæстыхайимæ.
Сывæллæтты сфæлдыстады галуан у культурон, ахуырадон æмæ историон кусæнуат. Ацы бæстыхайы дæсгай азтæ æххæст кæнынц фидаргонд традицитæ. Ам ногдзаутæ, ныр та сæ фæдонтæ дæр, кафыдысты, зарыдысты, ныв кодтой, архайдтой спортивон секциты. Цалцæг куы фæуа, æмæ галуан йæ дуæрттæ куы байгом кæна, уымæ се *ппæт дæр æнхъæлмæ кæсынц.
Ацы стыр рацарæзты кæронбæттæн мадзал суыдзæн йæ разы цы сквер ис, уый цалцæг. Пырх тротуартæм, фистæгæйцæуджыты фæндæгтæм хъæуы базилын. Аивгонд парк суыдзæн уарзон фæлладуадзæн бынат куыд галуаны хъомылгæнинæгтæн, афтæ Цæгат Ирыстоны се *ппæт цæрджытæн дæр.
