Ацы аз республикæйы мадзал сæххæст кæнынæн регистрацигонд æрцыди 26 фæзы
Цæгат Ирыстон архайдта географион диктанты. Ацы аз республикæйы мадзал сæххæст кæнынæн регистрацигонд æрцыди 26 фæзы. Егъау ахуырадон акцийы архайдтой мин адæймагæй фылдæр. Се хсæн студенттæ, скъоладзаутæ æмæ сæ ахуыргæнджытæ, стæй æндæр дæсныйæдты минæвæрттæ. Зонындзинæдтæ сбæрæг кæныны фæзтæй иу уыди Цæгат Ирыстоны университет. Дзуæппытæ лæвæрдтой 20 фарстæн, алкæцыйæн дæр дзы лæвæрд цыди минуты *рдæг. Хатдзæгтæ цæмæй æбæрæгæй баззайой, уый тыххæй архайджытæ сæ дзуæппытæ ныммыхуыр кодтой хицæн идентификацигонд номертимæ сæрмагонд гæххæттытыл. Алкæуыл дæр дзы ис сæрмагонд штрих, æмæ йæ фæрцы базонæн уыдзæни бæрæггæнæнтæ. Цæттæ уыдзысты 30-æм ноябры. Диктант 2015-æм азæй нырмæ æххæстгонд цæуы Уырыссаг географион æхсæнады хъæппæрисæй. Уал азмæ дзы сæ зонындзинæдтæ бафæлвæрдтой дыууæ милуан æмæ 5 сæдæ адæймагæй фылдæр. Æппæтæй цымыдисагдæр бынæттыл диктантæн нымад æрцыдысты æппæтадæмон космосон æмæ уæрæсейаг антарктикон станцæтæ.
