Дзæуджыхъæуæй уырдæм æппынæдзух æрвыст цæуынц уæзласæн машинæтæ нуазæн донимæ, хойрæгтимæ, генератортимæ æмæ æндæр хъæугæ дзаумæттимæ
Цæгат Ирыстон дарддæр æххуыс кæны Дагестанæн. Дзæуджыхъæуæй уырдæм æппынæдзух æрвыст цæуынц уæзласæн машинæтæ нуазæн донимæ, хойрæгтимæ, генератортимæ æмæ æндæр хъæугæ дзаумæттимæ. Ацы хъуыддагмæ се вæрæн хæссынц зæрдæхæлар адæм. Активонæй архайынц коллективтæ, куыстуæттæ, ведомствæтæ, студенттæ æмæ скъоладзаутæ. Уымæй фæстæмæ ма, Дагестаны кусы Адæмон фронты Фæсивæдон хайады отряд. Бархионтæ æххуыс кæнынц æрдзон фыдбылызы фæстиуджытæ аиуварс кæнынæн. Бæлвырддæр радзурдзæн Хъайтмазты Дзерассæ.
Сæумæрайсомæй машинæ дзаг кæнынц. Уæзласæны кузовы æвæрынц нуазæн донимæ бутылкæтæ, генератортæ, хойрæгтæ. æппæтæй хъæугæдæр дзаумæттæ абон æнæ хæдзарæй чи баззад, уыцы адæмæн. Дагестанæн Цæгат Ирыстон æххуыс кæны фыццаг бонтæй. Ацы хатт дон æмæ æндæр хъæугæ дзаумæттæ арвыстой республикæйы Сæргълæууæджы æмæ Хицауады администраци æмæ Адæмон фронты регионалон хайад.
Ирыстоны иуварс ничи æрлæууыд. Фæзы кусынц Дзæуджыхъæуы администрацийы кусджытæ, æхсæнадон организациты минæвæрттæ æмæ волонтертæ. Ацы хъуыддагмæ се вæрæн хæссынц студенттæ дæр. Зæрдиагæй сæ фæнды баххуыс кæнын хъыгдардбаййафæг адæмæн. Сæ дæнцæгæй æвдисынц, фыдбылызы бахаугæйæ,фæкæсын куыд ахсджиаг у, уый. Йе ххуысы хай бахаста ахуырады министрад дæр. Гуманитарон миссимæ йе вæрæн чи бахаста, уыдоны хыгъды Беслæны 1-æм скъола дæр. Ахуыргæнджытæ, ныййарджытæ æмæ ахуырдзаутæ хи фæрæзтæй хъыгдардбаййафджытæн балхæдтой 20 тоннæйы нуазæн дон.
Фæлæ гуманитарон нысан æрмæст хъæугæ дзаумæттæ æмбырд кæнын æмæ æрвитын нæу. Дагестаны хъыгдардбаййафæг районты кусы Адæмон фронты Фæсивæдон хайады отряд.
Бархионтæ æххуыс кæнынц æрдзон фыдбылызы фæстиуджытæ аиуварс кæнын. æххæст кæнынц алыхуызон куыстытæ.
Дагестаны цæрджыты фарсмæ æрбалæууын йæ хæсыл банымадта æппæт Ирыстон. Се вæрæн хæссынц организацитæ, ведомствæтæ, фæллойадон къордтæ, хицæн адæймæгтæ. Нуазæн доны стыр парти æмæ æндæр хъæугæ дзаумæттæ арвыста Дзæуджыхъæуы æхсæнадон совет дæр.
Æмæ уый Цæгат Ирыстоны æппæт æххуыс нæу Дагестанæн. Ацы хъуыддаг дарддæр æххæстгонд цæудзæн.
