Йемæ нæ республикæмæ уазæгуаты ссыд зындгонд хоккеист, дунейы, Европæйы æмæ Советон Цæдисы бирæ хæттыты чемпион Вячеслав Анисин
Цæгат Ирыстонмæ сластой Континенталон хоккейон лигæйы сæйраг трофей – Гагарины кубок. Йемæ нæ республикæмæ уазæгуаты ссыд зындгонд хоккеист, дунейы, Европæйы æмæ Советон Цæдисы бирæ хæттыты чемпион Вячеслав Анисин. Æвзонг ихуарзджытæ кубок фенгæйæ сразæнгард сты стыр спорты бæрзæндмæ схизынмæ. Куыд ацыдысты дæсныйадæвдисæг ахуыртæ, уый тыххæй радзурдзæн Тъехты Элинæ.
Зындгонд хоккеист, дунейы, Европæйы æмæ Советон Цæдисы бирæ хæттыты чемпион Вячеслав Анисинæй дæсныйадæвдисæг ахуыртæ цæгатирыстойнаг спортсментæн. 1972-æм азы Советон Цæдис – Канадæйы суперсерийы легендарон архайæгимæ базонгæ кæнынмæ æрбацыдысты 30 æвзонг спортсменæй фылдæр. Ныййарджытæ та стыр цымыдисимæ кастысты трибунæтæй.
Вячеслав Анисин нæ республикæмæ ссыд Континенталон хоккейон лигæйы сæйраг трофей – Гагарины кубок рамбулыны турнейы фæлгæты. Кубоккы æвзистыл фыст сты командæйы архайджыты нæмттæ. Æвзонг спортсметæн цымыдисаг уыд ацы хæрзиуæг фенын æмæ йемæ къамтæ сисын.
74 аздзыд легендарон спортсмен ихмæ хуымæтæджы нæ рацæуы. Ныр дæр ма аййæфдзæн бирæ æвзонг спортсменты. Лæппутæн ацы фембæлд æрмæст ног зонындзинæдтæ нæ радта, фæлæ ма балæвар кодта, бирæ азты сæ зæрдыл чи лæудзæн, ахæм æнкъарæнтæ. Вячеслав Анисин сын раргом кодта хоккейы сусæгдзинæдтæ æмæ загъта, лæппуты хорз фидæныл дызæрдыг кæй нæ кæны, уый.
Ихын аренæ «Тагбан»-ы техникон директор Алексей Бояркин куыд зæгъы, афтæмæй кубок нæ регионы кæй фæзынд, уый æхсызгон у. Стæй ма бафиппайдта, стыр спорты символизм кæй ис, уый. Зæгъæм, лæппутæ легендарон хоккеистимæ кæй базонгæ сты, уый сыл хорзырдæм фæахъаз уыдзæн.
Вячеслав Анисин куыд загъта, афтæмæй искуы ацы кубоккыл фæзындзысты ирон спортсменты нæмттæ дæр. Ууыл та дзурæг сты лæппуты абоны æнтыстдзинæдтæ.
