Эпидемиологон уавæры тыххæй бæрæггæнæнтæ æрвылкъуырион аппаратон æмбырды фехъусын кодта фæлхасадмæ цæстдарды управлени
Цæгат Ирыстоны 3-аг къуыри къаддæр кæны грипп æмæ æхснырсæгæй рынчынты нымæц. Эпидемиологон уавæры тыххæй бæрæггæнæнтæ æрвылкъуырион аппаратон æмбырды фехъусын кодта фæлхасадмæ цæстдарды управлени. Ныхас цыди, хъармгæнæн сезон кæй фæци, ууыл дæр. Цæрæнуæтты-коммуналон хæдзарады, артаджы æмæ энергетикæйы министр Таматы Майрæн бахаста, хъармгæнæн системæ 10-æм апрелы ахуыссын кæныны фæндон. Республикæйы Сæргълæууæг Сергей Меняйло бахæс кодта, хъармгæнæн системæ ахуыссын кæныны размæ фатерты æмæ социалон æгъдауæй ахсджиаг объектты температурæйы æмвæзадмæ цæстдарын. Аппаратон æмбырды ма æрдзырдтой, Арвыкомы фæндаг æхгæд куы вæййы, уæд республикæйы фæндæгтыл уæзласæн машинæтæй азмæлæн кæй нæ вæййы, ууыл. Регионы разамонæг фидарæй загъта, машинæтæ хъуамæ лæууой æрмæстдæр сæрмагонд æрлæууæн бынæтты. Æрлæууæнтæ куы байдзаг уой, уæд та уæзласæн машинæтæ хъуамæ рæстæгмæ республикæмæ ма уадзой.
