Æмбæлы сын гранттæ фæйнæ милуан сомы
Цæгат Ирыстоны 4 студенты систы инновацитæн æххуысы фонды конкурс «Студенческий стартап»-ы уæлахиздзаутæ. Æмбæлы сын гранттæ фæйнæ милуан сомы. Уый хорз ахъаз уыдзæн сæ проекттæ царды рауадзынæн. Не сфæлдыстадон къорд фембæлд Уалыты Азæмæт æмæ Чехты Дорæимæ. Уыдон радзырдтой, сæ бакуыстытæ цавæр пайда æрхæсдзысты, уый тыххæй. Бæлвырддæр хабæрттæ Хъайтмазты Дзерассæмæ.
Хæххон паддзахадон аграрон университеты студенткæ Чехты Дорæ у конкурс «Студенческий стартап»-ы уæлахиздзау. Расидт æй инновацитæн æххуысы фонд. Чызг бакуыста тамакойы сыфтæй сæрмагонд экстракт исыныл. Уый æххуыс кæны акнейы активон бактеритимæ тох кæнын. Проекты райрæзтæн Дорæ райста 1 милуан сомы.
Ныр 2-аг аз бæстæйы æххæстгонд цæуы стыр федералон проект – студентон технологон амалхъомдзинады программæ. Конкурс «Студенческий стартап» у йæ къабæзтæй иу. Сæйраг хæс – цæмæй 2030-æм азмæ бæстæйы æрвылаз гом кæна, студентон командæты тыхтæй конд, 30 мин чысыл инновацион куыстуаты бæрц.
Цæгат Кавказы хæххон-металлургон институты арæзтадон конструкциты кафедрæйы аспирант Уалыты Азæмæты проект дæр фæуæлахиз. Баст у сæрмагонд сейсмикон системæимæ. Ацы темæмæ йæм цымыдисдзинад сæвзæрд йæ разамонæг, кафедрæйы доцент Абайты Зауырбеджы фæрцы. Проект у ахадгæ, уæлдайдæр та æрæджы Турчы цы æвирхъау цаутæ æрцыд, уый хынцгæйæ.
Паддзахад цымыдисаг хъуыдытæ кæмæ ис, уыцы студенттæн дæтты, сæ проекттæ царды рауадзынæн фæрæзтæ райсыны фадат. Ацы аз конкурсмæ курдиаттæ лæвæрд æрцыд 6 миллиард сомæн.
Дора æмæ Азæмæтæй фæстæмæ ма, уæлахиздзаутæ систы Цæгат Ирыстоны паддзахадон университеты студенткæтæ Гатайты Оксанæ æмæ Валерия Зацепина.
