Уый фæрцы, бæрзонд технологитæм гæсгæ, нæ республикæйы арæзт æрцæудзæн экологон æгъдауæй æдас фармацевтон завод
Цæгат Ирыстоны æххæст кæнынц егъау инвестицион проект. Уый фæрцы, бæрзонд технологитæм гæсгæ, нæ республикæйы арæзт æрцæудзæн экологон æгъдауæй æдас фармацевтон завод. Уæвгæ йæ аразын райдайдзысты Алагиры районы Майрæмададжы ныгуылæн фарс 3 гектары территорийы. Эксплуатацийы та йæ раттынмæ нысан кæнынц 2025-æм азы. Заводы проектмæ гæсгæ сæххæст кæндзысты цалдæр ахсджиаг хъуыддаджы. Фыццаджыдæр – æппæтадæмон коопераци, дæргъвæтин куыстадон ахастдзинæдтæ, стæй Евразийы экономикон цæдисы Сомихы республикæимæ æнгом æмгуыстад. Проектыл бакуыстой, цæмæй адæмы æххæст кæной хæрзхъæд, æдас æмæ ахадгæ медицинон препараттæй. Заводы хъомыс уыдзæн – афæдзмæ 5 милуан препараты къоппы уадзын.
