Йæ нысан у бахъахъхъæнын историон намыс æмæ фæсивæды ахуыр кæнын Фыдыбæстæ хъахъхъæнджыты сгуыхтдзинæдтæн кад кæнын
Цæгат Ирыстоны æнтыстджынæй фæцис патриотон проект «Уæлахизы фæндæгтæ». Йæ нысан у бахъахъхъæнын историон намыс æмæ фæсивæды ахуыр кæнын Фыдыбæстæ хъахъхъæнджыты сгуыхтдзинæдтæн кад кæнын. Программæмæ гæсгæ уыд 53 экскурсион балцы. Архайдта дзы 2 мин скъоладзауæй æмæ студентæй фылдæр республикæйы алы районтæй. Маршруты кæронбæттæны уыдысты сывæллæтты телевизион проект «Позитивчики»-йы æвзонг журналисттæ. Бæлвырддæр радзурдзæн Хъайтмазты Дзерассæ.
Сывæллæтты телевизион проект «Позитивчики»-йы амонджытæ регионы æфсæддон намысы тыххæй фыццаг хатт нæ дзурынц. Æвзонг журналисттæ нæ бæстæйы Хъæбатыр горæтты цæттæ кодтой сфæлдыстадон куыстытæ Стыр Уæлахизы бонмæ. Экскурсион маршрутмæ рæзгæ фæлтæры æрбахуыдтой Цæгат Ирыстоны ахуырады æмæ наукæйы министрады сывæллæтты туризмы центр.
Проект «Уæлахизы фæндæгтæ» сси æнтыстджын къахдзæф фæсивæды патриотон хъомылады хъуыддаджы. Архайджытæн баххуыс кодта райгуырæн зæххы истори арфдæр базонын.
Проект «Уæлахизы фæндæгты» архайдта республикæйы 2 мин скъоладзауæй æмæ студентæй фылдæр. Алчидæр сæ æнæмæнг бахъуыды кæндзæн, Уæлахизæн Советон Цæдисы адæм цы стыр аргъ бафыстой, уый.
Программæйы архайджытæ бабæрæг кодтой республикæйы æфсæддон намысы бынæттæ, мемориалтыл сæвæрдтой дидинджытæ, уыдысты музейты æмæ не *мзæххонты сгуыхтдзинæдтимæ баст историон объектты. Экскурситы рæстæг æвзонг журналисттæ истой сæхи репортаж. Стендаптæ æмæ интервьютæ фысгæйæ пайда кодтой, экскурситæ аразджытæ сын кæй радзырдтой, уыцы информацийæ.
Æппæтуæрæсеон æфсæддон-патриотон программæ «Уæлахизы фæндæгтæ» æххæст кæны «Мидтуризмы райрæзты агентад» Уæрæсейы Федерацийы рухстауынады министрады æххуысæй федералон проект «Мы вместе»-мæ гæсгæ. Йæ нысан у, цæмæй маршруттыл ацæуа фылдæр фæсивæд æмæ нæ бæстæйы цытджын историон намыс сæ зæрдыл дарой.
