Æххуыс кæны сæрмагонд æфсæддон операцийы архайджыты бинонтæн
Цæгат Ирыстоны активонæй кусы бархионты хайад «Своих не бросаем «Топаз». Æххуыс кæны сæрмагонд æфсæддон операцийы архайджыты бинонтæн: хæдзары сæр сцалцæг кæнын, хойрæгтæ æмæ хостæ *рбахæссын. Ольгинскæйаг Кочысаты Мурат бахаста иу курдиат – нæлгоймагæн йæ зæххы хайы хъуыд быру саразын. Баххуыс ын кодтой бархионтæ. Бæстондæр хабæрттæ радзудзæн Чехойты Фатимæ.
Куыстытæ бацыдысты сæ тæмæны. Белтæ, бур æмæ цалдæр кусæджы. Бархионты змæлды активисттæ æххуыс кæнынц хæстон цауты ветеран Кочысаты Муратæн. Йæ хæдзары кæрты хъуыд ног быру саразын. Уыцы хæс нæлгоймагæн сæххæст кæнын йæхи бон нæ уыд. Сæрмагонд æфсæддон операцимæ Мурат ацыд 2023-æм азы. Йæ ныхæстæм гæсгæ, бирæ хъуыдытæ нæ кодта – хæсты уыдысты йæ хæлæрттæ æмæ зонгæтæ, уымæ гæсгæ иуварс лæууын нæ бафæрæзта. Службæ кодта Луганскы *рдыгæй. Йæ хæстæй иу æххæстгæнгæйæ сæ къорд бахауд тыхджын артиллерион æхсты бын. Мурат фæци уæззау цæфтæ, баззад æнæ къахæй.
Кочысаты Мурат цæры Ольгинскæйы. Ветеранæн баххуыс кæнынæн æрцыдысты 4 активисты æмæ бархионты змæлды разамонæг Валерий Васильев. Кусджытæ бацæттæ кодтой фæзуат фидæны быруйæн: скъахтой дзыхъхъытæ æмæ ныффидар кодтой цæджындзтæ. Куыстытæ кæнынц лæвар. Бархионты ныхæстæм гæсгæ, бирæ æфсæддонтæн ахæм æххуыс у ахсджиаг цæстдард æвдисæн.
Уыимæ ис æнæлыггонд фарстатæ дæр. Уыдонæй иу, Ольгинскæйы уынгты, рухсытæ кæй нæй, уый. Кочысаты Мураты ныхæстæм гæсгæ, хъæумæ бацæуæны талынг кæй вæййы, уый тыххæй иу æмæ дыууæ хатты нæ бахаста курдиат алыхуызон куыстуæттæм.
Бархионты змæлд дарддæр кусы сæрмагонд æфсæддон операцийы бинонтæн бæлвырд æххуыс кæныныл. Курдиат бахæссæн ис «Фыдыбæстæ хъахъхъæнджыты» фонды филиалмæ, æхсæнадон куыстуæтты Хæдзармæ, стæй комкоммæ бархионтæм.
