Уæрæсейы у фыццаг ахæм спортивон объект
Цæгат Ирыстоны байгом мексикæйаг боксы скъола. Уæрæсейы у фыццаг ахæм спортивон объект. Тренировкæтæ кæныны фадат дзы ис куыд сывæллæттæн, афтæ хистæр кары спортсментæн дæр. Се хсæн ис ирыстойнаг боксер Дауыраты Аслан. Æрæджы ссыди Мексикæйæ. Уым царди æмæ тренировкæтæ кодта цалдæр азы. Цы зонындзинæдтæ райста, уыдон æнæвгъауæй лæвар кæны, кæй фæнды, уыдонæн. Цымыдисаг тренировкæтæ федта не сфæлдыстадон къорд дæр.
Мексикæйаг бокс Ирыстоны зæххыл. Зындæр тренировкæтæ æмæ дисциплинæ. Цæгат Ирыстоны бакодтой мексикæйаг боксы дæсныдзинæдтыл сахуыр кæнæн кæм ис, ахæм зал. Уæрæсейы у æрмæстдæр иу. Тренер дзы у Дауыраты – Æлборты Аслан. 12 азы размæ Цæгат Ирыстойнаг боксер сфæнд кодта ног профессионалон æмвæзадмæ рацæуын. Уый тыххæй ацыд Мексикæмæ. Кæй зæгъын æй хъæуы, уым йæ къухы бафтыд фылдæр æнтыстдзинæдтæ. Лæппу сси, Сауль Альварес æмæ æндæр зындгонд спортсментимæ тренировкæтæ чи кæны, уый. Ирон лæджы миниуджытæ æндæр бæстæйы кæй æвдыста, уый тыххæй уым дæр йе мгæртты хсæн уыд фæзминаг. Мексикæйаг зонындзинæдтæ йæ бахъуыдысты нæ республикæйы дæр. Дзæуджыхъæуы боксер сфæнд кодта йæ зонындзинæдтæ балæвар кæнын бынæттон спортсментæн.
Аслан тренерæй ныллæууыд фыццаг хатт, фæлæ фидæны хъуыстгонд боксерты ныр дæр уыны. Тедеты Сæрмæт у сæ иу. Æрыгон чемпион иннæтæй хицæн кæны куыстмæ уарзондзинадæй. 6 сахаты тренировкæтæ йын дæттынц æрмæстдæр удæнцойдзинад. Боксерты фæнды ис Мексикæйы спортивон фæзы сæ профессионал райрæзтыл кусын. Уырдæм ацæуын сæ фæнды иумæ.
Залы архайынц алы кары адæм. 5 азæй фылдæр кæуыл цæуы, уыцы сывæллæттæ кусынц сæ арæхстдзинадыл, хистæртæ та æрбацæуынц, цæмæй фæхъæздыгдæр кæной сæ зонындзинæдтæ боксæй. Спортсменты хсæн ис бирæ спорт уарзаг адæм.
Мексикæйаг боксы характер бæрæг вæййы тренировкæты рæстæг дæр. Рингы домæнтæ æххæстгонд не сты. Цæйас хъуамæ уа, уымæй у бирæ къаддæр. Уымæй уæлдай ма залы фæархайынц чызджытæ дæр. Ис сын фадат программæ равзарынæн: Фитнесбокс, профессионалон цæттæдзинад æмæ хи хъахъхъæнынады элементтæ. Ацы хыгъд у, дæсны спортсмен цæуыл ахуыр кæны, уыдоны къаддæр хай.
