Ууыл ныхас цыд аппаратон æмбырды
Цæгат Ирыстоны бакусдзысты Горæтгæрон æмæ Мæздæджы районты рæзты программæтыл. Ууыл ныхас цыд аппаратон æмбырды. Дзанайты Барис профилон министрадæн бабар кодта ацы фарстайыл муниципалон скондты разамонджытимæ æрныхас кæнын. Ныхас ма цыд Аланийыл саргъуыды 1100 азы бон сбæрæг кæныныл. Финансты министрад радих кæндзæн 7 милуаны æмæ 500 мин сомы ирон литературæйы музей сцалцæг кæнынæн. Районты сæргълæуджытæн та бабар кодтой бæрæгбоны мадзæлтты пълан саразын. Æппæт районты ныридæгæн арæзт æрцыдысты зиутæ. Райдыдтой авигæнæн мадзæлттæ аразын. Зилынц мемориалтæм æмæ æфсæддонты ингæнтæм. Уæлахизы Бонмæ цæттæ кæнгæйæ та горæты администрацийы кусынц æфсæддон техникæйы маршруттæ снысан кæныныл. Уый баст у, ныртæккæ Штыбы фæзы цалцæггæнæн куыстытæ кæй цæуынц, уыимæ. Хицауады Сæрдар ма бабар кодта æппæт хъуыддæгтыл организацион комитеты радон æмбырды æрныхас кæнын.
