Уый фæдыл, кадджын мадзалы архайдтой республикæйы сæргълæууæг Сергей Меняйло, национ иртæстыты центры президент Михаил Ковальчук, директор Хъамболты Марат
Цæгат Ирыстоны бонтæ райдыдтой национ иртæстыты центр Курчатовы номыл институты Мæскуыйы. Уый фæдыл, кадджын мадзалы архайдтой республикæйы сæргълæууæг Сергей Меняйло, национ иртæстыты центры президент Михаил Ковальчук, директор Хъамболты Марат. Ахадгæ æмæ цымыдисаг программæ арæзт уыди культурон æмæ наукон мадзæлттæй. Бацæттæ йæ кодтой Цæгат Ирыстоны æмæ институты æмгуыстады фæлгæты. Баст уыди Ирыстоны Уæрæсеимæ баиу кæныны 250 азимæ, æмæ автономон республикæйæн бындур сæвæрыны 100 азимæ. Сергей Меняйло йæ раныхасы куыд загъта, афтæмæй Курчатовы институт у бæстæйы раззагдæр наукон центртæй иу, йемæ æмгуыстад Цæгат Ирыстонæн дæтты бирæ гæнæнтæ. Уæлдæр ахуыргæнæндæттæн фадат ратдзæн сæ профессионалон æмвæзад фæуæлдæр кæнынæн. Ныридæгæн республикæйы байгом Курчатовы номыл кълæстæ, сæ фæрцы æнтыстджынæй скъолаты кæнынц профориентацион куыст. Сергей Меняйло бузныг загъта институты разамындæн нæ республикæйы æнусон историйы, хъæбатыр адæмы, культурæйы, нæ традицитæ æмæ æгъдæутты тыххæй радзурыны фадат кæйы ис, уый тыххæй. Национ иртæстыты центры минæвæрттæ Цæгат Ирыстоны Сæргълæууæджы схорзæхджын кодтой уæлдæр наукон хæрзиуæг – Курчатовы номыл 1-аг къæпхæны сызгъæрин майданæй.
