Афтæ, Национ проект «Спорт норма жизни»-йы фæлгæты арæзт æрцыдысты бирæвæрсыг спортивон фæзтæ, физкультурон-дзæбæхгæнæн комплекстæ æмæ æнæниз цардыуагæн гом спортивон объекттæ
Цæгат Ирыстоны дарддæр активонæй рæзы спортивон инфраструктурæ. Афтæ, Национ проект «Спорт норма жизни»-йы фæлгæты арæзт æрцыдысты бирæвæрсыг спортивон фæзтæ, физкультурон-дзæбæхгæнæн комплекстæ æмæ æнæниз цардыуагæн гом спортивон объекттæ. Дзæуджыхъæуы байгом спортивон хъæбысхæстæй нырыккон тренировкæтæгæнæн центр. Æрыдоны та – спортивон комплекс. Егъау рацарæзты фæстæ Беслæны байгом стадион «Пищевик» дæр. 3 миллиард сомæн æххæстгонд цæуынц спорты инфраструктурæйы 12 объекты. Бæлвырддæр радзурдзæн Фидараты Маринæ.
Раздæр ацы бынæтты уыди быдыр. Фæлæ дзы ивгъуыд азы сентябры бындур æвæрд æрцыди нырыккон спортивон комплексæн. Сарæзтой йæ национ проект “Спорт норма жизни”- æххæст кæнгæйæ. Æвзонг спортсмен Зæгæлаты Марк баскетболæй архайын райдыдта, 3 азы йыл куы цыди, уæд. Сразæнгард æй кодта, скъолайы цы турнир цыди, уый. Раздæр та цыди, ахуыргæнæндоны цы зæронд спортивон зал уыди, уырдæм. Уадиссаг уавæртæ дзы нæ уыди. Уый нæ хынцгæйæ, лæппу йæ командæимæ сси республикæйы чемпион, стæй йæхи дæнцæгæн хæссинагæй равдыста æппæтуæрæсеон ерысты. Ныр, афæдзмæ хæстæг тренировкæтæ кæны ног спортивон комплексы, æмæ тырны ног æнтыстытæм.
Ныртæккæ спортивон комплексы кусы 8 секцийы, архайынц дзы 5 сæдæ адæймагæй фылдæр. Сывæллæтты спортивон скъолайы директор Хъайтыхъты Сослан куыд загъта, афтæмæй ма сентябры фæнд кæнынц ноджыдæр дыууæ секцийы байгом кæнын. Уый, грекъаг-римаг хъæбысхæстæй æмæ самбойæ секцитæ. Уымæй уæлдай, комплексы территорийы ис стыр теннисæй архайынæн корт.
Национ проект “Бизнес – спринт” Я выбираю спорт”-ы фæлгæты ног спортивон объект фæзынд Сунжæйы дæр. У гом фæзы хуызы. Æмхæццæ хъæбысхæсты хуызтæй профессионалон æгъдауæй чи архайы, уыцы спортсментæй иу, Цхуырбаты Георгий ам йе спортивон цæттæдзинадыл бафтауы, йæ сæйраг тренировкæтæй йын уæгъд рæстæг куы вæййы, уæд. Куыд зæгъы, афтæмæй ам ис æппæт уавæртæ æмæ гæнæнтæ.
Ивгъуыд аз паддзахадон программæ «Физкультурæ æмæ спорты райрæзт» æххæстгæнгæйæ Беслæны реконструкци скодтой стадион «Пищевик»-æн. Уæвгæ, йæ истори райдыдта 1934-æм азы. Бирæ рæстæг уыди æвæгæсæг. Хъуыдис æм бæстонæй базилын. Трибунæтæ сты 200 адæймагæн. Стадион цæттæ у профессионалон турниртæ кæнынæн. Фæзы ис аразгæ уæлцъар, нырыккон рухсгæнæнтæ, стæй нырыккон дондзæуæн системæ.
Дзæуджыхъæуы та æххæстгонд цæуы æндæр проект – физкультурон-дзæбæхгæнæн комплекс “Клеверспорт”. Ивгъуыд пресс-конференцийы рæстæг республикæйы физкультурæ æмæ спорты министр Кочиты Сослан куыд загъта, афтæмæй егъау спортивон объекты арæзтад фылдæр адæмæн фадат ратдзæн æнæниз цардыуагмæ сразæнгард уæвынæн. Проектыл куыст цæудзæн инвесторимæ иумæ.
Зæгъын хъæуы уый дæр, æмæ 2023-æм азæн спорты къабазы национ проекттæ æххæст кæнынæн дихгонд æрцыди 3 сæдæ милуан соммæ хæстæг.
