Трассæ Джызæл-Хъæрмæдон-Дæргъæвс-Дзуарыхъæу суыдзæн нырыккондæр, æдасдæр æмæ зæрдæмæдзæугæдæр регионы цæрджытæн æмæ уазджытæн
Цæгат Ирыстоны дарддæр цæуы республикæйы ахсджиагдæр туристон фæндæгтæй иуы стыр реконструкци. Трассæ Джызæл-Хъæрмæдон-Дæргъæвс-Дзуарыхъæу суыдзæн нырыккондæр, æдасдæр æмæ зæрдæмæдзæугæдæр регионы цæрджытæн æмæ уазджытæн. Ныртæккæ специалисттæ æххæст кæнынц куыстытæ, фæндаг уæрæх кæныны, къуылдымтæ фидар кæныны æмæ хидты рацарæзты фæдыл. Бæлвырддæр хабæрттæ радзурдзæн Хъайтмазты Дзерассæ.
Иу метр иннæйы фæстæ уæззау техникæ ивы Цæгат Ирыстоны рæсугъддæр фæндæгтæй иуы хуыз. Джызæл-Хъæрмæдон-Дæргъæвс-Дзуарыхъæуы уаццагыл дарддæр цæуы стыр реконструкци. Цы хаймæ зилынц, уый иумæйаг дæргъ у 15 километры бæрц. Ныртæккæ специалисттæ æххæст кæнынц зæххы куыстытæ. Трассæ фæуæрæхдæр кæнынæн сыгъдæг кæнынц æмæ лыг кæнынц хæххон къуылдымтæ, фидар кæнынц уырдыгтæ æмæ нысан кæнынц ног фæндаг. Хицæн уаццагтыл стыр куыст сæххæст кæнын хъæуы. Æрмæст трассæйы 400 метры хайыл аразджыты хъæуы бакусын зæхцъары 200 мин кубометрæй фылдæр.
Æрвылбон объекты кусынц экскаватортæ, бульдозертæ, уæзласæн машинæтæ æмæ дæсгай специалисттæ. Проекты нысангонд ис инженерон уынаффæты стыр комплекс. Хицæн уаццагтыл сараздзысты быцæугæнæн къултæ быраугонд цæджындзтыл. Уыдоны фæрцы бантысдзæн сфидар кæнын хæххон къуылдымтæ. Асфальты бын сæвæрдзысты 38 донуадзæн хæтæлы.
Реконструкцимæ гæсгæ ма ахæсдзысты инженерон коммуникацитæ, электрон тыхдæттæг линитæ, газы æмæ доны хызтæ. Æдасдзинад фæбæрзонддæр кæныны тыххæй æппæт уаццагыл сæвæрдзысты нырыккон бырутæ. «Джызæл-Хъæрмæдон-Дæргъæвс-Дзуарыхъæу» у республикæйы ахсджиагдæр туристон фæндæгтæй иу. Кæд стыр рацарæзт цæуы, уæддæр фæндаг нæ сæхгæдтой, транспорт ыл цæуы. Хатгай специалистты бахъæуы рæстæгмæ змæлд бауромын, фæлæ архайынц, цæмæй ахæм цаутæ арæх ма уа, ууыл.
Проектмæ гæсгæ куыстытæ нысангонд сты 3 азмæ, фæндты ис объект сцæттæ кæнын 2028-æм азы. Ацы хъуыддаг æххæстгонд цæуы нацпроект «Цардæн инфраструктурæ»-мæ гæсгæ.
