Уый у æхсæнадон хæрзиуæг, снысан æй кодта зындгонд поэты номыл наукон-культурон центр
Цæгат Ирыстоны гуманитарон æмæ социалон иртæстыты институты кадджын уавæры хорзæхгонд æрцыдысты «Хетæгкаты Къоста»-йы ордены кавалертæ. Уый у æхсæнадон хæрзиуæг, снысан æй кодта зындгонд поэты номыл наукон-культурон центр. Ацы хæрзиуæг лæвæрд æрцæуы культурæмæ, аивадмæ æмæ ирон литературæйы рæзтмæ стыр æвæрæн бахæссыны тыххæй. Йæ автор у «Иры уæлдæр советы» Мæздæджы районы хайады сæрдар Гуцаты Фридон. Уæ зæрдыл уын æй лæууын кæнæм, хæрзиуæг фыццаг хатт радтой 3 азы размæ. Ацы хатт æй, се нæзæрдæхудт фæллойы тыххæй саккаг кодтой Хуссар Ирыстоны Абайты Васойы хæдзар-музейы директор Остъаты Мæдинæйæн, Цæгат Ирыстоны сгуыхт скульптор Дзукъаты Николайæн, Цæгат Ирыстоны гуманитарон æмæ социалон иртæстыты институты директор Хъаныхъуаты Зæлинæйæн æмæ иконæфыссæг Айларты Олланæйæн.
