Уый нæ, фæлæ ма иуæй-иу куыстуæтты хъомыс рæзы
Ныгуылæн бæстæтæ Уæрæсемæ экономикон цæстæнгас кæй аивтой, уый нæ хынцгæйæ, Цæгат Ирыстоны хъæууонхæдзарадон къабаз фæцудынмæ нæ хъавы. Уый нæ, фæлæ ма иуæй-иу куыстуæтты хъомыс рæзы. Æхсыр æмæ дзидзайы продукцийы фæлхасгæнджыты нымæц кæны фылдæрæй-фылдæр. Нысантæнм гæсгæ, рæхджы бынæттон продукци апарахат уыдзæн уæрæсейаг базарады. Иу ахæм æнтыстджын куыстуат бабæрæг кодтой нæ республикæйы хъæууон хæдзарады министрады специалисттæ. Фидараты Маринæ радзурдзæн бæлвырддæр.
Раст аргъауы куыд вæййы, афтæ æхсыры цæугæдæттæ. Алы минут дæр дзы æвгтæ байдзаг вæййынц. Радон парти цæттæ у дуканитæм бахæццæ уæвынмæ. Æхсыры продукцийы хуызтæ сты бирæ æмæ алывæрсыг.
Ацы куыстуаты æхсыруадзæн цех æрæджы фæзынд. Кусæнгæрзтæ сты уæрæсейаг. Хомаг дæр бынæттон. Хæрзхъæд æхсыр ласынц Цæгат Кавказы республикæтæй æмæ ма суанг Воронежæй дæр. Фæлæ æхсыр линимæ рауадзыны размæ скæнынц лабораторон иртæстытæ.
Уæдæ куыстуаты аразынц ирон цыхтытæ дæр. Цæхджын, чи алæууыд, ахæм æмæ ногахст. Адон сты 3 сæйраг хуызы. Фæлхасгæнæг сæ арæх агуры. Æмæ ам ницы сусæгдзинад ис – технологтæ спайда кодтой рагон методикæйæ.
Сыхаг цехы та аразынц къалбасы алы хуызтæ. Ассортимент хæрзхъæд æмæ алывæрсыг. 3 азмæ куыстадон процесс иу минут дæр не рлæууыд. Уæдæ архайдыл нæ фæбæрæг ныртæккæйы уавæр дæр. Куыстуаты сæйраг продукци фæсарæйнагæй баивын нæ бахъуыд. Пайда кæнынц бынæттон цехтæй ласт дзидзайæ. Ис сæм сæхи æргæвдæн бынат дæр. Æнæмæнг хъæугæ хъуыддаг – ветеринарон цæстдард.
Санкцион змæлд нæ фæбæрæг цæгатирыстойнаг куыстуатыл. Уыйхыгъд продукцийы рауагъд фæфылдæр. Æмæ ууыл æрлæууынмæ нæ хъавынц. Нысан кæнынц сæ архайд фæуæрæхдæр кæнын. Ассортименты фæзындзæн хус æхсыр æмæ сылы. Уымæй арæх пайда кæнынц адджинæгтæ аразæн цехы.
Ахæм куыстуæтты архайд Цæгат Ирыстоны кæй нæ фæцудыдта, уый хъæууон хæдзарады министрады минæвæрттæ бæттынц экономикон бæрæггæнæнтимæ. Хомаг ласыны системæ кусы, куыд æмбæлы, афтæ. Уымæй дарддæр бакуыстой логистикæйыл, бафыстой æмгуыстады бадзырдтæ æмæ æндæр ахсджиаг хъуыддæгтыл. Уæдæ паддзахады рдыгæй æххуыс кæй цæуы, ома льготæтæм гæсгæ кредиттæ исгæйæ, фадат фæзынд куыстуаты хъомыс фæфылдæр кæнынæн.
Ацы компани æнтыстджынæй фыццаг аз нæ кусы. Уыимæ базарад фæнд кæнынц фæуæрæхдæр кæнын. Нырма уал продукци фенæн ис æрмæстдæр Цæгат Ирыстоны.
