Куыст куыд цæуы, ууыл æрныхас кодтой, Хицауады сæрдар Дзанайты Барисы разамындæй цы æмбырд ацыди, уым
Цæгат Ирыстоны Хицауады æххæстгонд цæуы республикæйы социалон-экономикон рæзты стратеги, нысангонд у 2030-æм азы онг. Куыст куыд цæуы, ууыл æрныхас кодтой, Хицауады сæрдар Дзанайты Барисы разамындæй цы æмбырд ацыди, уым. Программон документ хъуамæ сног кæной, Уæрæсейы Хицауад кæй сфидар кодта, Цæгат Кавказы федералон зылды уыцы стратегийы фæткмæ гæсгæ. Мах субъект бирæ къабæзты размæ акодта зынгæ къхдзæф. Ахсджиаг у, ацы куыст дæлæмæ ма руадзын, уымæ гæсгæ, æппæт документтæ хъæуы домæнтæм гæсгæ бацæттæ кæнын æмæ сæ Уæрæсейы экономикон рæзты министрадмæ бавдисын. Дзуапдæттæг оргæнтæ бахастой фæндон, республикæйы рæзтæн ахадгæ чи у, ахæм къабæзтæ рапарахат кæнын. Уыдоны хсæн – агропромышленнон, туристон-рекреацион, медицинон, культурон-этнографион кластертæ, промышленнон æмæ транспортон-логистикон комплекстæ, информацион технологитæ, экологи, амалхъомдзинад, стæй хæххон территоритæ. Уымæй уæлдай, хыгъды сты – инвестицитæ æмæ инновацитæ, арæзтад æмæ цæрæнуæтты-коммуналон хæдзарад, артаг æмæ энергетикон комплекстæ. Ног документы мыхуыр уыдзысты Цæгат Ирыстоны экономикон рæзты бæлвырдгонд модельтæм гæсгæ алывæрсыг рæзты къабæзтæ. Фылдæр æргом дзы здæхт уыдзæни сæхи хуыздæр чи равдыстой, æмæ республикæ хуыздæр æмвæзадмæ чи кæны, ахæм инвестицион проекттæм. Дзанайты Барис бахæс кодта, стратеги сног кæныны тыххæй ведомствæты хсæн къамис снысан кæнын. Йæ хыгъды уыдзысты республикæйы хицаудзинады оргæнтæ, бынæттон администрациты разамонджытæ, бизнес-æхсæнады организацитæ æмæ хæдбар эксперттæ.
