Нæ атлетты хыгъды 1 сыгъзæрин æмæ 2 бронзæ майданы
Цæгат Ирыстоны иугонд командæ æнтыстджынæй йæхи равдыста Уæрæсейы чемпионаты рог алтеликæйæ, æвзæр чи хъусы, ахæм спортсменты хсæн. Нæ атлетты хыгъды 1 сыгъзæрин æмæ 2 бронзæ майданы. Турнирæй æрыздæхгæйæ, спортсментæ дарддæр тренировкæтæ кæнынц æмæ сæхи цæттæ кæнынц радон ерыстæм. Бæлвырддæр хабæрттæ радзурдзæн Хъайтмазты Дзерассæ.
Разминкæ, сабыр цыд æмæ рог тезгъо – афтæ райдайы Гаглойты Жаннæйы тренировкæ. Æрæджы спортсменкæ Уæрæсейы чемпионаты рог атлетикæйæ, æвзæр чи хъусы, уыдоны хсæн бацахста фыццаг бынат.
Ацы чемпионат Ирыстонæн сси æнтыстджын. Республикæйы 2 минæвары ма – Айдарты Тамерлан æмæ Гæбæраты Виктория бацахстой 3-аг бынæттæ æфсæйнаг къори æппарынæй.
Ахæм бæрæггæнæнтæ спортсменты къухы бафтыд цыбыр рæстæгмæ. Гаглойты Валерий æмæ Георгий, æвзæр чи хъусы, æмæ йæ астæуы стæг хъыгдард кæмæн у, уыдонимæ кусын райдыдтой 5 азы размæ. Ныр сæ разамындæй архайынц алы кары атлеттæ. Сæ хсæн сывæллæттæ дæр, æмæ фæлтæрдджын спортсментæ дæр.
Цæгат Ирыстоны иугонд командæйы хыгъды – дунейы æмæ бæстæйы чемпионатты раззагдæр бынæттæ. Ис Олимпаг хъæзтыты призертæ дæр. Ацы кадртыл та республикæйы иугонд командæйы уæнг Кокойты Алан тренировкæйы рæстæг басаста дунеон рекорд æфсæйнаг къори æппарынæй. Фехста йæ 17 метры дæргъæн. Ныр уыцы хатдзæг хъæуы сфидар кæнын хæстæгдæр ерысты.
