Йæ хыгъды уыд 38 спортсмены
Цæгат Ирыстоны иугонд командæ армрестлингæй бацахста фыццаг бынат Уæрæсейы чемпионаты Орелы. Йæ хыгъды уыд 38 спортсмены. Фидарæй снысан кодтой республикæйы статус, куыд спорты ацы хуызы лидер. Ныртæккæ командæ цæттæ кæны дунейы фыццаг бынат бацахсыны ерыстæм Индийы. Бæлвырддæр радзурдзæн Хъайтмазты Дзерассæ.
Æнтыстджын тренировкæ уæлахизы фæстæ. Фæллад уадзынæн рæстæг нæй. Уæрæсейы чемпионат фæцис, разæй – дунейы чемпионат. Гæбæраты Хетæг цæттæ кæны фæззæджы ерыстæм Индимæ ацæуынмæ бæстæйы иугонд командæйы хыгъды. Спорты ис 3 азы æмæ *рдæг, фæлæ Уæрæсейы чемпион фыццаг хатт сси. 18 азы йедтæмæ йыл нæма цæуы. Йæхи равдыста юниорты, стæй хистæрты *хсæн дæр, фæлæ алы уæзы категориты. Дыууæ хуызы ерысты дæр йæ къухы бафтыд иттæг хорз бæрæггæнæнтæ.
Уæрæсейы чемпионат армрестлингæй уыд апрелы горæт Орелы. Цæгат Ирыстоны иугонд командæйы уыд 38 спортсмены. Ацы аз тренертæ зæрдæ дардтой æрыгон командæйыл æмæ дзæгъæлы нæ. Хатдзæгтæм гæсгæ бацахстой фыццаг иумæйаг командон бынат, хорз бæрæггæнæнтæ – хи хыгъдты дæр.
Хатдзæгтæм гæсгæ Уæрæсейы иугонд командæмæ равзæрстой 18 хистæр кары спортсмены æмæ 7 юниоры. Европæйы чемпионатмæ бæлвырд аххоссæгтæм гæсгæ ацы аз бахауын къухы нæ бафтдзæн, фæлæ дунейы чемпионаты фæнд кæнынц сæхи æнтыстджынæй равдисын.
Республикæйы иугонд командæйы тренертæ зонынц чемпионты хъомыл кæнын. Уымæн хъæуы рæстæг æмæ спортсменты фæндон. Зал ам афтид никуы вæййы. Ног спортсментæ тырнынц уæлахиздзауты æмæ призерты бафæзмынынмæ, уыдон та – номдзыд армрестлерты. Фæлтæрты ахæм бастдзинады фæрцы алы ерысты дæр зæлынц Уæрæсейы æмæ Ирыстоны гимнтæ.
