Волгоградмæ ацыдысты Сафаевты бинонтæ Алагирæй
Цæгат Ирыстоны командæ архайы Æппæтуæрæсеон хъазт «Семейная зарница»-йы дыккаг сезоны къæпхæны. Волгоградмæ ацыдысты Сафаевты бинонтæ Алагирæй. Семæ ис се ххуысгæнæг æмæ разамонæг – æфсæддон цауты ветеран Датиты Алан. Командæйы 5 адæймаджы: дыууæ фырты Давид æмæ Саид, мад Зитæ æмæ сæ хæстæг Азæмæт. Ивгъуыд аз Къадзты Зитæ йæхæдæг архайдта «Зарницæ»-йы финалы, куыд хистæр къорды разамонæг. Ныр та йæ бафæндыд йæ бинонтимæ бацархайын. Йæ фырттæ ахуыр кæнынц Алагиры скъолайы кадетон къласы. Æдæппæтæй хъазты кæронбæттæн къæпхæны архайынц 400 адæймаджы. Разæй сæм æнхъæлмæ кæсынц маршрутон квест-хъазт, сфæлдыстадон конкурс æмæ хъæздыг культурон программæ. Сæйраг ерыс уыдзæн æфсæддон-патриотон хъазт æфсæддон полигоны. Æппæтуæрæсеон хъазт саразыныл бакуыстой «Фыдыбæстæ хъахъхъæнджыты» паддзахадон фонд, Фыццæгты змæлд, æфсæддон-патриотон æхсæнадон змæлд «Æвзонг æфсæддонтæ», стæй æфсæддон-спортивон цæттæдзинады æмæ патриотон хъомылады Центр «Воин».
