Республикæйы хъæбысæй хæцыны æртæ академийы стæй Суворовы номыл училищæйы ацыдысты дæсныйадæвдисæг ахуыртæ
Цæгат Ирыстоны олимпаг чемпионтæ фембæлыдысты æрыгон спортсментимæ. Республикæйы хъæбысæй хæцыны æртæ академийы стæй Суворовы номыл училищæйы ацыдысты дæсныйадæвдисæг ахуыртæ. Фæсивæдæн фадат уыд фæрстытæ раттынæн. Чемпионтæ сын раргом кодтой спорты сусæгдзинæдтæ. Ахуыртæ уыдысты æхсызгон куыд æрыгон спортсментæн, афтæ чемпионтæн сæхицæн дæр. Бæлвырддæр радзурдзæн Тъехты Элинæ.
Æрыгон спортсментæм секцимæ æрбацыдысты Уæрæсейы уæззау атлетикæйы Федерацийы президент Максим Агапитов, стæй олимпаг хъæзтыты призер æмæ спортивон скъолайы директор Æлбегаты Руслан. Спорты фæндагыл æрлæууыд йæхæдæг. Фæсивæды уарзондæр спортсментæ æрыгæтты фарстатæн æнæзивæгæй радтой дзуæппытæ, раргом сын кодтой сæ сусæгдзинæдтæ, Федерацийы разамонæг та бацамыдта, спортсмен хъуамæ æндæр уæлæдарæсы дæр йæхи куыд фæдары, уый.
Уымæй уæлдай ма проекты программæйы уыд цымыдисаг фембæлд. Архайдтой дзы Уæрæсейы Олимпаг комитеты президенты уынаффæгæнæг æмæ Уæрæсейы спортсменты цæдисы президент Давид Мусульбес, республикæйы спорты министры хæдивæг Санаты Аидæ æмæ Цæгат Ирыстоны уæззау атлетикæйы Федерацийы президент Лазарты Владимир. Æрныхас кодтой спорты алы хуызты райрæзтыл регионы. Спортивон æмбалдзинады тыххæй Давид Мусульбес Уæрæсейы спортсменты цæдисы номæй схорзæхджын кодта кады гæххæттæй Уæрæсейы уæззау атлетикæйы Федерацийы президент Максим Агапитовы. Стæй йын балæвар кодта ирон худ æмæ нымæт.
Олимпаг хъæзтыты архайджытæ æнæцæстдардæй нæ ныууагътой хъæбысхæцты фæзтæ дæр. Республикæйы æртæ академийы ацыдысты дасныйадæвдисæг ахуыртæ. Андиаты Сосланы номыл уæгъдибар хъæбысхæцты скъолайы фæсивæдæн тренировкæтæ скодтой ирыстойнаг чемпионтæ Рæмонты Сослан æмæ Гуæцæлты Хадзымурат.
Олимпаг хъæзтыты архайджытæ бабæрæг кодтой Цæгат Кавказы суворовы номыл æфсæддон училищæ. Фидæны Фыдыбæстæ хъахъхъæнджытæн уыд фадат фарстатæ раттынæн. Иуæн дзуапп радта спорты министры хæдивæг æмæ фехтованийæ олимпиадæйы сыгъзæрин майданы хицау Санаты Аидæ.
Фембæлды уыдысты уæгъдибар хъæбысхæцты олимпаг чемпион Хаджимурат Магомедов, стæй Уæрæсейы сывæллæтты спорты Федерацийы президент, спорты мастер фехтованийæ – Белла Нусуева. Алчидæр сæ училищæйы ахуырдзаутæн балæвар кодта йæ зонындзинæдтæ.
Сæ уарзондæр спорсменты суазæг кодтой æрыгон фехтовальщиктæ дæр. Дæсныйадæвдисæг ахуырты фæстæ байгом кодтой , æртæ хатты олимпаг хъæзтыты чемпионкæ, фараст хатты дунейы чемпионкæ Галина Гороховайы хæрзиуджытæ рамбулыныл турнир. Ацы аз йæ архайджытæ уыдысты сæдæ спортсменæй фылдæр. Уæрæсейы спортсменты цæдисы уæнгтæ куыд зæгъынц, афтæмæй спорт уарзаг æрыгон фæсивæдæн ис хорз цæттæдзинад.
Олимпаг чемпионтимæ фембæлдтытæ æрыгон спортсментæн сты ахъаззаг, уымæн æмæ сын сты дæнцæгæн хæссинаг. Гæнæн ис, æмæ тагъд рæстæджы уыдон дæр суыдзысты Ирыстоны хъуыстгонд спортсментæ.
