Арæзт уыдысты цалдæр къæпхæнæй
Хетæгкаты Къостайы номыл Цæгат Ирыстоны паддзахадон университеты аивæдты факультеты дыууæ боны цыдысты сфæлдыстадон фæлварæнтæ. Арæзт уыдысты цалдæр къæпхæнæй. Актеры дæсныйады хайадмæ цæмæй бацæуай, уый тыххæй абитуриентты хъуыди 4 туры ахизын: æмдзæвгæ бакæсын, вокалон æмæ пластикон гæнæнтæ равдисын, спортивон цæттæдзинад раргом кæнын, стæй уæд бæстон ныхас. Уый фæрцы абитуриент хъуамæ равдиса йæ зонындзинæдтæ культурæйы, политикæйы æмæ æхсæнадон царды къабæзтæй. Сæ тыхтæ бафæлварынмæ æрбацыдысты скъолаты æмæ республикон колледжты рауагъдонтæ. Ацы аз абитуриентты хсæн уыдысты Хуссар Ирыстоны минæвæрттæ дæр. Цалдæр специализацимæ ныридæгæн æмбырдтæ фесты. Уымæй дарддæр ма гæххæттытæ бадæттæн ис театралон педагогикæйы специализацимæ. Уыцы куыст цæудзæн 10-æм августмæ.
