Нысангонд у, ахуыр кæнгæйæ æмæ кусгæйæ, скъолайы агъоммæ кары сабиты чи хъомыл кæны, уыцы студенттæн æмæ кусджытæн
Цæгат Ирыстоны паддзахадон университеты психологон-педагогон факультеты бындурыл байгом сывæллæтты клуб. Нысангонд у, ахуыр кæнгæйæ æмæ кусгæйæ, скъолайы агъоммæ кары сабиты чи хъомыл кæны, уыцы студенттæн æмæ кусджытæн. Фыццаг хъомылгæнингты клуб суазæг кæндзæн ног ахуыры азы райдиан. Бæлвырддæр радзурдзæн Хъайтмазты Дзерассæ.
Ног клубы фыццаг уазджытæй иу сси сæрмагонд æфсæддон операцийы архайæг æмæ психологон-педагогон факультеты фыццаг курсы студент Леуанты Алыксандр. Æрыгон фыд куыд зæгъы, афтæмæй ахуыр кæнын, бинонты дарын æмæ æндæр хæстæ æххæст кæнын æнцон нæу. Уымæ гæсгæ ахæм фæз кæй байгом, уый æнæмæнг хъæугæ æххуыс у.
Клуб байгом кæныны мадзалы уыдысты Дзæуджыхъæуы администрацийы сæргълæууæджы хæдивæг Ходы Мæдинæ, университеты ректор Огъуаты Алан, проректор Кокайты Алан, стæй хæстæгдæр рæстæг центры гæнæнтæй чи спайда кæндзæн, уыцы ныййарджытæ. Социалон проекты нысан у, скъолайы агъоммæ кары сабиты чи хъомыл кæны, университеты уыцы студенттæн, æрыгон ахуыргæнджытæн æмæ кусджытæн æххуыс кæнын.
Сывæллæтты клуб кусы психологон-педагогон факультеты бындурыл университеты æмдзæрæны. Райдзаст агъуыстытæ æххæст сты æппæт хъæугæ ифтонггæрзтæй æмæ фæрæзтæй сывæллæтты алывæрсыг райрæзтæн.
Уыцы иу рæстæг клубы сæ бон уæвын у, 7 азы онг кары 15 сывæллонæн. Ныййарджытæн сæ сæ бон ныууадзын у 4 сахаты æмгъуыдмæ. Уыимæ ма центр суыдзæн ахуырадон фæз дæр. Ам практикон фæлтæрддзинад исдзысты психологон-педагогон факультеты студенттæ.
Клуб æрбынат кодта 1-æм æмдзæрæны фыццаг уæладзыджы æмæ сси æрыгон бинонтæн æнцонвадат тыгъдад аразыны куысты хай. Хъæппæрис дзуапп дæтты паддзахадон политикæйы хæстæн. Нысангонд сты, 2030-æм азмæ бæстæйы райрæзты национ нысанты тыххæй Президенты указы.
Сæрдыгон мæйтæ суыдзысты ног фæзы техникон куысты рæстæг. Ног ахуырадон азы райдиан та клуб суазæг кæндзæн йæ фыццаг хъомылгæнинæгты.
