Проекты сæйраг нысан у – фæсивæды сфæлдыстадон æмæ наукон хъомыс раргом кæнын
Цæгат Ирыстоны паддзахадон университеты кадджын уавæры байгом кодтой студентон наукæйы бонтæ. Проекты сæйраг нысан у – фæсивæды сфæлдыстадон æмæ наукон хъомыс раргом кæнын. Студентон наукæйы бонтæ систы æрыгон иртасджыты ныхасæн ахадгæ фæз. Уым радзурынц сæ наукон хъæппæристы æмæ æрхъуыдыдзинæдты тыххæй. Ахуыры азы дæргъы студенттæ сæ наукон разамонджытимæ, сæ кафедрæты æмæ факультетты фæкæнынц сфæлдыстадон куыст. Уый сын фадат радты, иртасæн куысты фыццаг къахдзæфтæ скæнынæн, фидæны та стыр наукæмæ бацæуынæн, магистртæ æмæ аспиранттæ суæвынæн. Цæгат Ирыстоны паддзахадон университеты наукæйы бонтæ сты æргом мадзалыл нымад. Фенын æмæ дзы архайыны бар ис республикæйы студенттæн æмæ скъоладзаутæн. Саразджытæ нысан кæнынц наукон конференцитæ, семинартæ, наукон квесттæ, бизнес-хъæзтытæ, симпозиумтæ, гом дуæртты бонтæ, равдыстытæ æмæ наукон кинонывты премьерæтæ аразын.
