Дидинæгмæ зилынц æрдзон зонæдты æмæ технологийы факультеты ахуыргæнджытæ æмæ студенттæ
Цæгат Ирыстоны паддзахадон университеты кæрты ракалдта цымыдисаг дидинæг – пыльцеголовник длиннолистный, зæгъгæ, Сырх чиныгмæ хаст, стæм зайæгой. Домы сæрмагонд цæстдард, хъæуы йæ хъахъхъæнын. Дидинæгмæ зилынц æрдзон зонæдты æмæ технологийы факультеты ахуыргæнджытæ æмæ студенттæ. Бæстондæр хабæрттæ радзурдзæн Чехойты Фатимæ.
Дидинæгæн йæ уынд – цыма зынаргъ урс æлыгæй у, афтæ. Йæ хæйттæ, чысыл къусты хуызæн, здыхт сты уæларвмæ. Хауы Орхидонтæм, уымæн ын ис ахæм æнахуыр конд. Ацы хъæддаг орхидея зайы Евразийы æмæ Цæгат Америкæйы. Æмæ куыд æмбæлы, афтæ æххæст у рагон фæлывд миниуæгæй. Дидинæг у æцæг сайæгой. Нектар нæ ратты, мыдыбындзыты йæхимæ *лвасы йæ ирд хуызæй, стæй йын, йæ химикон сконды руаджы цы хæрздæф ис, уымæй. Уарзы аууон бынæттæ, фылдæр зайы бæлæсты бын. Хурмæ, стæй бынтон талынг ран кæй нæ аирвæздзæн, уый тыххæй йæ ахуыргæндтæ схуыдтой «аристократ». Хаст у Уæрæсейы Сырх чиныгмæ. Тæссаг у фесæфынæй. Æрвылаз æй фенæн вæййы Дзæуджыхъæуы алы рæтты. Зæгъæм, Цæгат Ирыстоны паддзахадон университеты кæрты. Ацы хатт дисы бафтыдта ахуыргæнджыты æмæ студентты – иу дидинæджы бæсты рафтыдта цыппар.
Ам фенæн ис дидинæджы æртæ хуызы. Даргъсыфонæй уæлдай – стæм сырх æмæ ставд дидинæгджын. Тагъд рæстæг сыл разайдзæн ног къалиутæ. Æрдзон зонæдты æмæ технологиты факультеты ахуыргæнджытæ æмæ студенттæ сæм зилынц , сæ хицæндзинæдтыл фæдзурынц ахуырты рæстæг.
Хъæддаг орхидея – æцæг алæмæты фæзынд. Хорз уаид, ацы стæм дидинæг куы нæ фесæфид, æмæ йæ рæсугъддзинадæй адæмы зæрдæтæ бирæ азты куы рухс кæнид, уый.
