Уæрæхгонд æмбырды архайдтой республикæйы Сæргълæууæг Битарты Вячеслав æмæ Уæрæсейы прокуроры хæдивæг Андрей Кикоть
Цæгат Ирыстоны прокуратурæйы хатдзæгтæ скодтой ивгъуыд азы куыстæн. Уæрæхгонд æмбырды архайдтой республикæйы Сæргълæууæг Битарты Вячеслав æмæ Уæрæсейы прокуроры хæдивæг Андрей Кикоть. Республикæйы прокурор Александр Морозов æмбырд гом кæнгæйæ фæнысан кодта къорд фарстайы, кæцытæ домынц паддзахадон æмæ барадон оргæнты æмгуыстад. Сæрмагонд ныхас цыд Уналы æрдзæн зианхæссæг хауæццæгтæ кæм æмбырд кодтой, уый фæстиуджытæ аиуварс кæныны мадзæлттыл. Æрдзырдтой цæугæдон Терчы бассейны сыгъдæггæнæнтæ саразыныл, арæзтадон æмæ хæдзары хауæццæгтæ скунæг кæныныл æмæ «Электроцинчы» хауæццæгтæ раласыныл. Прокурорты æмбырды æнæрхъуыдыйæ нæ баззад энергон ресурсты хæстæ кæй рæзынц, уыцы хъуыддаг дæр.
Республикæйы Сæргълæууæг Битарты Вячеслав раарфæ кодта прокуратурæйы кусджытæн, алыхуызон куыстуæттæн сæ куысты мызды хæстæ бафидынæн кæй баххуыс кодтой, уый тыххæй. Афтæ фарон цæстдарæн ведомствойы фæрцы сæхгæдтой 49 милуан сомы бæрц хæс, æмæ сæ куысты мызд райстой 1800 адæймаджы.