Историйы азфыссæг объекттæ сæ дуæрттæ байгом кодтой 22-æм майы
Цæгат Ирыстоны радон хатт бацархайдта æппæтуæрæсеон акцийы «Музейты æхсæв». Историйы азфыссæг объекттæ сæ дуæрттæ байгом кодтой 22-æм майы. Ацы аивады хуызмæ фæхæстæгдæр уæвыны фадат уыд алкæмæндæр. Традицимæ гæсгæ музейтæм бацæуæн уыд лæвар. Цавæр экспозицитæ фенæн уыд нæ республикæйы, уый тыххæй радзурдзæн Касаты Наирæ.
Дыууæ азмæ фыццаг хатт акци «Музейты хсæв» цæуы æххæст форматæй. Амæй размæ йæ ковиды тыххæй кодтой онлайн хуызы. Традицимæ гæсгæ ацы бон фæбæрæг кæнынц майы æртыккаг фæлладуадзæн бонтæм. Кинонывтæ, лекцитæ æмæ дæсныйадæвдисæг ахуыртæ. Программæ алы хатт дæр вæййы алывæрсыг æмæ ахадгæ. Алы музей дæр ацы хсæв равæры йæ хуыздæр æмæ цымыдисагдæр экспозицитæ. Ацы хатт дæр рауади романтикон æмæ адæймаджы миддуне фæхъæздыгдæр кæнынæн пайда. Камины залы дисы фтауæг зæлтæ æмæ импровизацигонд сценæ. Театралон аивады музей бацæттæ кодта уникалон экспонаттæ. Нывгæнджытæ Светлана Володина æмæ Эмма Вергелесы декорацитæ æмæ костюмтæ уæрæх аудиторийæн равдыстой фыццаг хатт. Фæлæ æрмæстдæр иу бон – сæрмагондæй «Музейты хсæв»-æн.
Уыцы хсæв бабæрæг кæнæн уыди æрмæст иунæг музей нæ. Цырыхаты Георгийæн уый уыди уæлдай хатт аивады рæсугъддзинад банкъарыны фадат. Куыд зæгъы, афтæмæй бирæ экспонаттæй хи атонæн зын уыди.
Стыр программæ бацæттæ кодта Тугъанты Махарбеджы аивæдты музей дæр. Акцийы фæлгæты ам байгом скульптор Кæсæбиты Андрейы сæрмагонд равдыст. Экспозицийы ис 40 куыстæй фылдæр. Фæлæ дзы алчидæр аивадуадуарзджыты зæрдæты ссардта бынат.
Ацы кадртæ та сты Хетæгкаты Къостайы хæдзар-музейæ. Йæ программæ баст уыди ирон æвзаг æмæ литературæйы бындурæвæрæджы цард æмæ сфæлдыстадимæ. Ацы хсæв алкæмæн дæр фадат ис ивгъуыды тæваг банкъарынæн. Æрбацæуджытæн бацæттæ кодтой экскурси, радзырдтой сын поэты биографийæ цымыдисаг хъуыддæгтæ. Музейы кусджытæ бацæттæ кодтой сæрмагонд конкурстæ дæр.
Адæймагмæ афтæ кæсы, цыма экспонатты уд ис. Оперон аритæ фыццаг хатт зæлынц театры нæ, фæлæ равдысты. «Музейты æхсæв» æцæгæй дæр у алæмæты рæстæг. Мариинаг театры музыканттæ акцийы архайджытæн бацæттæ кодтой сфæлдыстадон лæвар. Камерон концерт у Мариинаг театры филиал æмæ Пушкины номыл нывкæнынады музейы филиалы æмгуыстады хатдзæг.
«Музейты хсæв» æппæт равдыстыты фæзтæ дæр æнафонмæ уыдысты гом, бабæрæг сæ кодтой сæдæгай адæмтæ. Цæгат Ирыстоны акци ацыд 13-æм хатт.
