Архайы дзы 80 конкурсанты онг Цæгат Кавказы æмæ Хуссар федералон зылдтæй
Цæгат Ирыстоны райдыдта профессионалон арæхстдзинадæй национ чемпионаты æвзарæн къæпхæн, йе нæниздзинад хъыгдард кæмæн у, ахæм адæмы хсæн. Архайы дзы 80 конкурсанты онг Цæгат Кавказы æмæ Хуссар федералон зылдтæй. Сæ зонындзинæдтæ æвдисдзысты скъоладзаутæ, студенттæ æмæ специалисттæ. Ерыс кæндзысты 7 компетенцимæ гæсгæ. Бæлвырддæр радзурдзæн Хъайтмазты Дзерассæ.
Ирон чъиритæ фыцын, скъолайы агъоммæ хъомылад æмæ ма æндæр компетенцитæ. Цæгат Ирыстоны базарадон-экономикон колледжы райдыдта профессионалон арæхстдзинадæй национ чемпионаты æвзарæн къæпхæн, йе нæниздзинад хъыгдард кæмæн у, ахæм адæмы хсæн. Ерыстæ ма арæзт цæуынц Дзæуджыхъæуы электроникæйы колледжы бындурыл.
Æвзарæн къæпхæны архайы 80 конкурсанты онг Цæгат Кавказы æмæ Хуссар федералон зылдтæй, 32 эксперты, бархионтæ æмæ хæдбар цæстдарджытæ. Регионалон чемпионатты уæлахиздзаутæ 3 боны дæргъы ерыс кæндзысты 7 компетенцийы хуыздæры ном райсыныл. Сæ тыхтæ æвзардзысты скъоладзаутæ, студенттæ æмæ специалисттæ.
Змæлд «Абилимпикс» æххæстгонд цæуы нацпроект «Фæсивæд æмæ сывæллæтты» федералон проект «Профессионалитет»-мæ гæсгæ. Ерыстæй фæстæмæ ма чемпионаты архайджытæн бацæттæ кодтой экскурситæ дæр.
Цæгат Ирыстоны чемпионаты аразджытæ сты ахуырады æмæ наукæйы министрад, Цæгат Ирыстоны базарадон-экономикон колледж æмæ змæлд «Абилимпикс»-ы регионалон центр, федералон оператор профессионалон ахуырады райрæзты институты æмæ президентон платформæ «Уæрæсе – гæнæнты бæстæ»-йы æххуысæй.
