4-æм мартъимæ æппæт 516 мин экземпляры хъуамæ уой цæттæ
Цæгат Ирыстоны райдыдтой æвзарæн бюллетеньтæ мыхуыр кæнын. 4-æм мартъимæ æппæт 516 мин экземпляры хъуамæ уой цæттæ. Процесс куыд æххæстгонд цæуы, уымæ бæстон кæсынц æвзарæн къамисы уæнгтæ мидхъуыддæгты министрады кусджытимæ. Бæлвырддæр хабæрттæ радзурдзæн Касаты Наирæ.
Бæлвырд æмæ тагъд… Иу иннæйы фæдыл мыхуыр кæнынц æвзарджыты бюллетеньтæ. Процесс иу минут дæр нæ лæууы. Ахсджиаг у, цæмæй алы адæймаг дæр æвзæрстыты бон ацы гæххæттыл сæвæра нысан. Ахæм документ цехы фыццаг хатт нæ кæнынц. Уымæ гæсгæ сын куыст у зонгæ æмæ йæ æххæст кæнынц æнцонæй. Æрмæст иу сахатмæ машинæ ныммыхуыр кæны 6 мин стыр гæххæттæй фылдæр. Алкæцыйыл дæр дзы фæйнæ æртæ бюллетены. Æвзарджыты сæйраг документыл фыст ис Уæрæсейы Президенты бынатмæ кандидатты тыххæй цыбыр информаци. Нæмтты бакомкоммæ афтид квадраттæ. Сæ иуы дзы æвзарæг хъуамæ сæвæра исты нысан. Бюллетены ахсджиаг у алы фæзилæн дæр. Цехы специалисттæ куыд зæгъынц, афтæмæй фæтк æххæст кæнын у сæйраг хъуыддаг.
Бюллетень гæххæттыл ныммыхуыр кæнын у хъуыддагæн йе мбис. Цæттæ гæххæт аппаратæй куы рацæуы, уæд æй арвитынц радон станокмæ. Ам документтæ бæстон нымад бакæнынц. Æппæт куыстытæ кæнынц къухæй, цæмæй дзы рæдыд ма рцæуа, уый тыххæй.
Æвзарæн бюллетенты тираж æрвыст æрцæудзæн республикæйы сæрмагонд бастдзинады управленимæ 4-æм мартъийы. Уый фæстæ документтæ арвитдзысты территориалон æвзарæн къамисмæ.
