Æрвылаз тæвд дон 2 къуыримæ кæй ахуыссын кæнынц, уый горæты цæрджыты тыхсын кæны
Цæгат Ирыстоны райдыдтой хъармгæнæн сезонмæ цæттæ кæнын. Æрвылаз тæвд дон 2 къуыримæ кæй ахуыссын кæнынц, уый горæты цæрджыты тыхсын кæны. Фæлæ æнæ уыцы мадзалæй системæйы æнæкъуылымпы куыст уазал рæстæг сæххæст кæнын нæ бантысдзæн. Специалисттæ æрлæууын кæнынц хъармгæнæнтæ, цæмæй æхсидæн куыстытæ бакæной, баивой кæлæддзаг уаццæгтæ, ссыгъдæг кæной ифтонггæрзтæ. Æмæ афтæ горæты 118 объекты. Бæлвырддæр радзурдзæн Хъайтмазты Дзерассæ.
Кæмæндæр сæрд фæлладуадзæн сезон у. Доны куыстуаты минæвæрттæн та æппæтæй бæрнондæр рæстæг. Специалисттæ цæттæ кæнынц ифтонггæрзтæ уазæлттæм, иуварс кæнынц, зымæджы къуылымпыдзинæдтæм расайынæй тæссаг кæмæй у, уыцы лыггæнинаг фарстатæ. Æрвылаз тæвд дон 2 къуыримæ кæй ахуыссын кæнынц, уый горæты цæрджыты тыхсын кæны. Фæлæ æнæ уыцы процедурæйæ системæйы æнæкъуылымпы куыст уазал рæстæг сæххæст кæнын нæ бантысдзæн. Хъармгæнæнты куыст куы æрлæууын кæнынц, уæд æххæстгонд фæцæуы профилактикон мадзæлтты комплекс. Кусджытæ бæлвырд кæнынц ифтонггæрзтæ, ивынц хъæугæ хæйттæ, иуварс кæнынц къуылымпыдзинæдтæ.
Зымæгтæ цæттæгæнæн куыстытæ цæуынц æппæт республикæйы. Æрмæст горæты хъæуы базилын 118 хъармгæнæнмæ æмæ 44 централон хъармгæнæн пунктмæ. Куыстыты ахадындзинад фæбæрзонддæр кæныны тыххæй Дзæуджыхъæу адих кодтой 8 хъармгæнæн районыл. Алкæцыйыдæр нысангонд æрцыд хицæн цалцæггæнæн бригадтæ, æдæппæтæй фондзсæдæ кусæгæй фылдæр. Уый фæрцы профилактикон мадзæлттæ уыцы иу рæстæг æххæстгонд цæуынц цалдæр объектыл.
Диагностикæйы рæстæг кæд рабæрæг вæййы, хъармгæнæны ифтоггæрзтæ тынг кæлæддзаг кæй сты, кæнæ сæ кæй хъæуы бæстонæй сцалцæг кæнын, уæд æрвыст æрцæуынц куыстуаты сæрмагонд цалцæггæнæн цехмæ. Ам хъармæй æххæст кæныны системæйы элементтæм базилынц æмæ сæ фæстæмæ арвитынц æппæт республикæйы объекттæм. Цех æххæстгонд у æппæт хъæугæ ифтонггæрзтæй алыхуызон куыстытæ кæнынæн. Специалисттæм ис станоктæ, æндадзæн аппараттæ æмæ æндæр техникæ. Хъармгæнæнтæ уазæлттæм цæттæ кæндзысты æнæхъæн сæрд.
