Æрæфы районы цæрджытæ æнхъæл дæр нæ уыдысты, районы искуы æмбæлгæ уавæртимæ сывæллæтты физкультурон дзæбæхгæнæн комплекс фæзындзæн, уый
Фæстаг рæстæг Цæгат Ирыстоны сæрмагонд программæты фæрцы адæмы æнцон цардæн бирæ мадзæлттæ арæзт æрцыд æмæ цæуы. Æрæфы районы цæрджытæ æнхъæл дæр нæ уыдысты, районы искуы æмбæлгæ уавæртимæ сывæллæтты физкультурон дзæбæхгæнæн комплекс фæзындзæн, уый. Ныр йæ арæзтад ис йæ тæмæны. Зæрдæ дарæн ис, æхсæнады абоны уавæртæй йæ арæзтады цыд къуылымпы кæй нæ баййафдзæн, ууыл. Уæвгæ уал ныртæккæ æппæт куыстытæ дæр конд цæуынц æмгъуыдæй раздæр. Арæзтады уавæр, стæй Æрæфы районы сывæллæттæ цы уавæрты архайынц уый федта Сосранты Жаннæ, æмæ йын бакæсæм йæ сюжетмæ.
Ацы комплекс конд цæуы хъæууон хæдзарады федералон программæ «Хъæууон территориты иумæйаг райрæзт» – мæ гæсгæ. Ныры уонг куыстыты цыд у æмгъуыдæй тагъддæр. Проект конд у нырыккон домæнтæм гæсгæ.
Бæстыхайы уыдзæн дыууæ уæладзыджы. Йæ аргъ у 250 милуан сомы. Подрядчик кусы, цæмæй æппæт куыстытæ дæр конд æрцæуой æмгъуыдæй раздæр. Ныртæккæ объектыл архайы 30 адæймагæй фылдæр. Физкультурон дзæбæхгæнæн комплекс хъæугæ кæй у Æрæфы районы, уый та гуырысхойаг нæу.
Цалынмæ физкультурон дзæбæхгæнæн комплекс аразынц, уæдмæ та уал сывæллæттæ архайынц къуындæг уавæрты. Æрæфы районы спортивон скъолайы бирæ уæгъдибар хъæбысæй хæцджытæ рацыд. Бирæ æзты дзы уыд канд уыцы секци. Ныр йæ разамынд, районы хицауады фарсхæсты фæрцы, архайы сæ сбирæ кæныныл. Цæмæй сывæллæттæн уа, фылдæр гæнæнтæ сæ курдиат æмæ арæхстдзинæдтæ æргом кæнынæн. Бирæ рæстæг дзы нæ кусы спортивон гимнастикæйы къорд. Йæ байгомыл цин кæнынц Цыколайы цæрджытæ.
Уæвгæ Цъебойти Рустам сывæллæтты спортивон гимнастикæмæ æмхиц кæныныл зæрдиагæй кусы. Цыколамæ цæуы Лескенæй. Уым дæр, дыккаг аз кусы ацы секци. Архайы алы кары сывæллæттимæ.
Рустам куыд зæгъы, афтæмæй спортивон кусæндзаумæттæ сын кæд нæ фæг кæны, уæддæр сæ зæрдæ дарынц ног комплексы сæ гæнæнтæ кæй фæхуыздæр уыдзысты ууыл.
Скъолайы цалцæг кæд бæллиццаг нæу, уæддæр дзы ныййырджыты хъарутæй барæвдз кодтой хи найæн.
Æрæфы районы спортивон скъола алывæрсыгæй кæны йæ куыст. Кæд залы архайынц радыгай, уæддæр æнæзæрдæхудтæй, зæрдиагæй кусынц сывæллæтты æнæниздзинад фидардæр кæныныл. Æмбарынц æй, сабийæн гыццылæй куы нæ раиртасай йæ курдиа, куы нæ йæ бабæдтай спортыл, уæд фæстæдæр, кæй байрæджы уыдзæн, уый. Зæгъын ма хъæуй уый дæр æмæ Æрæфы районы физкультурон дзæбæхгæнæн комплексы арæзтад та сæ кæй уырнын кæны фидæны хуыздæр æмы фылдæр гæнæнты фæззындыл.
