Нæ республикæйы ирон æвзаджы райрæзтыл цæуы ахадгæ куыст
Цæгат Ирыстоны сбæрæг кодтой мадæлон æвзаджы бæрæгбон. Нæ республикæйы ирон æвзаджы райрæзтыл цæуы ахадгæ куыст. Зæгъæм, Алайнаг гимназы уроктæ иууылдæр цæуынц ирон æвзагыл. Кусынц дзы ууыл, цæмæй сывæллæттæ канд дзургæ нæ, фæлæ ма хъуыды дæр кæной иронау. 2018-æм азæй фæстæмæ нæ республикæйы ахады программæ «Ирон æвзаджы национ – культурон райрæзт». Куыд кусынц мадæлон æвзаг бахъахъхъæныныл, уый тыххæй бæлвырддæр радзурдзæн Тъехты Элинæ.
5 аздзыд Дзарасаты Константин æнæкъуылымпыйæ дзуры ирон æвзагыл. Мадæлон æвзаджы рæсугъддзинад базыдта сывæллæтты райрæзты студи «Фæндиаджы». Светланæ йæ хъæбулы хъæбулмæ уроктæй канд æнхъæлмæ нæ фæкæсы, фæлæ ма йæм фæкæсы хæдзармæ куыст кæнынмæ дæр. Куыд зæгъы, афтæмæй æвзаг цæрдзæн, цалынмæ йыл дзурой сывæллæттæ, уæдмæ.
Ирон æвзаг ахуыр кæнынæй уæлдай ма сывæллæттæ ам базонынц нæ традициты тыххæй, сахуыр кæнынц национ зарджытæ æмæ æмдзæвгæтæ.
Сывæллæтты райрæзты студи у социалон проект. Фæзынд 5 азы размæ. Арæзт у мадæлон æвзаг бахъахъхъæныны тыххæй. Центрмæ сæ сывæллæтты æрбакæнынц, ирон æвзаг мадæлон кæмæн нæу, уыдоны дæр. Уымæн æмæ сæ фæнды, цæмæй сæ кæстæртæ дзурой иронау. Ахуыртæ дзы цæуынц къуыри 3 хатты. Сывæллæтты ахуыр кæнынц Берлицы методикæмæ гæсгæ. Æппынæдзух дзурынц иронау, цæмæй сывæллæттæ ирон дзырдыл сахуыр уой, уый тыххæй. Студийы рауагъдонтæ фылдæр хатт бацæуынц Алайнаг гимназмæ. Гимназы кусынц ууыл, цæмæй сывæллæттæ канд дзургæ нæ, фæлæ ма хъуыды дæр цæмæй кæной иронау.
Алы чиныгыл дæр канд фыссæг нæ кусы, фæлæ ма редактор, корректор æмæ дизайнер. Рауагъдад «Ир»-ы куыд зæгъынц, афтæмæй интелектуалон бынтæ бахъахъхъæнын æмæ мадæлон æвзагыл ног литературæ саразын, уæлдайдæр та сывæллæттæн – зын у. Фæлæ цæлхдуртæ нæ хынцгæйæ, национ литературæйы классикты уацмыстæ мыхуыр кæнгæйæ «Ир» вдисы Ирыстоны культурæ æмæ аивад.
Специалисттæ куыд зæгъынц, афтæмæй хъæуы æвзаджы райрæзтыл кусын. Цæгат Ирыстоны кусы республикон программæйы проект «Ирон адæмы национ – культурон райрæзт». Ахады 2025-æм азмæ.
Æвзаг у нацийы хæзна. Алы адæм дæр ног фæлтæрæн адæттынц сæ мадæлон æвзаджы хъæздыгдзинад. Абон сæйрагдæр у бахъахъхъæнын æмæ фæхъæздыгдæр кæнын уыцы æвзаг.
