Снысан æй кодтой 7 азы размæ, Сочийы Олимпаг хъæзтыты кадæн
Куыд æппæт бæстæйы, афтæ Цæгат Ирыстоны дæр сбæрæг кодтой зымæгон спорты хуызты бон. Снысан æй кодтой 7 азы размæ, Сочийы Олимпаг хъæзтыты кадæн. Нæ республикæйы зымæгон спорты хуызтæй уæлдай уарзондæр сты хоккей æмæ къахдзоныгътыл аив бырыны хуыз. Се ргом сæм аздæхтой кæстæртæ дæр. Зæгъæм, Кучиты Миланæйыл цæуы 12 азы, фæлæ ныридæгæн дæр ныфсджынæй рацæуы ихын фæзмæ. 8 азы тренировкæтæ кæнгæйæ, сахуыр бирæ зын элементтæ кæныныл. Ныридæгæн ын ис æнтыстдзинæдтæ дæр. Радон хатт майдан æмæ кады гæххæтт æхсызгонæй райста Олимпаг чемпионкæ фехтованийæ Санаты Аидæйы къухтæй. Уæвгæ, æвзонг спортсментæм ис спорты бæрзæндтæм тырнындзинад. Дæнцæг кæмæй исой, уый дæр сын ис. Уымæн æмæ бирæтæ ныридæгæн дæр Цæгат Ирыстоны æмæ Уæрæсейы ном дæрдтыл айхъуысын кодтой. Зæгъæм, ирыстойнаг скъолайы хъомылгæнинаг къахдзоныгътыл аив бырынæй Влад Мирзоев у дунейы фæсивæдон ерысты призер. Уый æмæ ма æндæр лæппутæ æмæ чызджытæ равдыстой, бæрзонд пъедесталмæ æнæ бирæ тренировкæтæй схизæн нæй. Уымæ гæсгæ нæ республикæйы арæзт цæуынц æппæт æмбæлгæ уавæртæ, алывæрсыг тренирвкæтæ кæнынæн. Уыимæ канд зымæгон нæ, фæлæ афæдзы алы афон дæр. Спорты зымæгон хуызты бон кæд æрыгон бæрæгбон у, уæддæр æй нæ республикæйы цæрджытæ бауарзтой. Ацы хатт æй срæсугъд кодтой Цæгат Ирыстоны æмæ Грознайы æрыгон фигуристкæтæ æмæ хоккеисттæ. Се ппæт дæр бæллынц стыр спортмæ бахауын, майдантæ æмбулын æмæ дунеон рекордтæ æвæрын. Ацы бæрæгбонмæ кæсгæйæ та фидарæй уырны, кæй сын бантысдзæн, уый.
