Нæ республикæйы 18-æм хатт арæзт æрцыд конкурс «Наукæмæ къæпхæн»
Ахуырадæн хорз бындур куы сæвæрай, уæд фидæны ис наукæмæ æвæрæн бахæссын дæр. Уымæн та фадат дæттынц зонадон конкурстæ. Цæгат Ирыстоны сбæрæг сты хуыздæр æрыгон иртасджытæ. Нæ республикæйы 18-æм хатт арæзт æрцыд конкурс «Наукæмæ къæпхæн». Ацы аз дзы архайдтой 216 сывæллоны 3 кары къорды. Конкурс цыди дыууæ къæпхæнæй. Æвзонг иртасджытæ бацæттæ кодтой проекттæ 22 хуызмæ гæсгæ. Дзæуджыхъæуккаг скъолатæй дарддæр ма дзы архайдтой республикæйы 5 районы æмæ сыхаг регионты ахуыргæнæндæтты минæвæрттæ.
Ацы аз 1-аг къæпхæны дипломтæй схорзæхджын кодтой 61 адæймаджы, 47 иртасæджы бацахстой дыккаг бынæттæ, 35-æй та систы 3-аг бынаты дипломты аккаг. Зæгъдзыстæм ма уый дæр, æмæ конкурсмæ цымыдисдзинад рæзы афæдзæй-афæдзмæ. Лæппутæй æмæ чызджытæй бирæтæ зонадон конкурсы фыццаг хатт нæ архайынц.
