35 азы уый кусы сывæллæттимæ
Ахуыргæнæг… иу дзырд, фæлæ арф хъуыды. Алы адæймаджы цардвæндаджы дæр ахуыргæнæгæй бирæ аразгæ вæййы. Уый æрмæст ахуырадмæ нæ разæнгард кæны сывæллоны, фæлæ йæм гуырын кæны фидар удыхъæды миниуджытæ. Цæгат Ирыстоны сгуыхт ахуыргæнæджы кадджын номы аккаг сси Архонкæйы 2-æм скъолайы педагог Ирина Лысоконь. Йæ фæллойадон фæндаджы тыххæй йын бæлвырддæр радзурдзæн Касаты Наирæ.
Сергей Меняйлойæ дидинджыты баст æмæ бирæ азты æнæзæрдæхудт куыстæн æвдисæндар -республикæйы сгуыхт ахуыргæнæджы кадджын ном. Иринæ Лысоконь 35 азы кусы сывæллæттимæ. Йæ ахуырдзатæн рагæй дæр у уарзон æмæ сгуыхт архуыргæнæг. Ам сæйрагдæр у, йæ райдианы раст фæндагыл æрлæууын, ома, раст дæсныйад равзарын, зæгъы Ирина Алексеевна.
Сывæллоны ахуырмæ сразæнгард кæнын, адæймаджы раппæлинаг миниуджытæ йæм гуырын кæнын, æмæ йын йæ хъомыладыл архайын. Ацы хæстæ æнцон сæххæст кæнæн не сты, фæлæ Ирина Лысоконь йæ куыстыл иузæрдион кæй у, уымæ гæсгæ йын зын нæу. Ахуыргæнæг куыд зæгъы, афтæмæй хатгай сывæллоны иу фарста æнæхъæн урочы пълан аивы.
Хими у царды тыххæй æмæ цардæн наукæ, амынд дзы цæуынц, зæххы къорийы цы цæуы, уыцы лыстæг фæзилæнтæ. Ацы предмет хъуамæ уарзай зæрдæйæ, афтæ куы нæ уа, уæд æй сабитæн дæр æххæстæй нæ бамбырын кæндзынæ. 35 азмæ Иринæ йæхæдæг дæр ахуыр кодта, скодта педагогтæн йæхи формулæ.
Иринæйы ныхæстæм гæсгæ йын йæ куыст дæсныйад нæу, фæлæ йæ царды фыццаг хъуыддæгтæй иу. Æнæ уымæй ахуыргæнæг йæ сæйраг хæс нæ сæххæст кæндзæн.
