Стыр æргом аздæхтой профилон паддзхадон программæтæм æмæ федералон проекттæм
Цæгат Ирыстоны спортивон къабазы сæйрагдæр фарстатыл æрныхас кодтой, Дзанайты Барисы разамындæй æмбырды. Стыр æргом аздæхтой профилон паддзхадон программæтæм æмæ федералон проекттæм. Премьер-министр куыд загъта, афтæмæй алы æмвæзады хицаудзинады оргæнты æмархайд фадат дæтты физкультурæйы æмæ спорты рæзтæн. Профилон министр Фрайты Сослан куыд фехъусын кодта, афтæмæй ивгъуыд азы хатдзæгтæ сты хорз. Цы хъуыддæгтæ нысан кодтой, уыдон иууылдæр сæххæст кодтой. Ацы азмæ дæр сæ размæ сæвæрдтой бирæ хæстæ. Цалдæр проекты хъæуы царды рауадзын. Афтæ, Цæгат Ирыстоны спортивон къабазы рæзтæн цы федералон æмæ республикон бюджетты фæрæзтæ радих кодтой, уыдонæй фæнд кæнынц олимпаг резервы 8 скъолайæн спортивон кусæнгæрзтæ балхæнын. Уымæй дарддæр Дзæуджыхъæуы, Ногиры, Беслæны æмæ Черменыхъæуы арæзт æрцæудзысты «зондджын» фæзтæ. Спортивон-технологон кусæнгæрзтæй сифтонг кæндзысты фæллоймæ æмæ хъахъхъæнынадмæ цæттæдзинады фæзтæ.
