Уæвгæ, спорты ацы хуызы республикæйы минæвæрттæн æдзухдæр вæййы бæрзонд хатдзæгтæ
Æрæджы Орелы облæсты уыд Уæрæсейы чемпионат армрестлингæй. Ерысты хатдзæгтæм гæсгæ, Цæгат Ирыстоны спортсментæ командон хыгъды бацахстой фыццаг бынат. Уæвгæ, спорты ацы хуызы республикæйы минæвæрттæн æдзухдæр вæййы бæрзонд хатдзæгтæ. Спортсментæ чемпионатмæ сæхи куыд цæттæ кæнынц, уый тыххæй радзурдзæн Хъайтмазты Дзерассæ.
Хъæддых характер æмæ тырнындзинад Мария Матвеевайæн дæттынц, лæппутимæ æмрæнхъ уæвыны, чызджытæй та раздæр лæууыны фадат. Къуыри 5 хатты тренировкæтæ, æмæ афтæ 6 азы дæргъы. Профессионалон спортсменкæ бæлвырд нысантæ æвæры йæ размæ, æмæ сæ фидарæй æххæст кæны. Марияйы ныхæстæм гæсгæ, йæ бæллиц уыд сæххæст кæнын спорты мастеры норматив. Ацы аз рагæй кæмæ тырныдта, уыцы спортивон æнтыстдзинад йæ къухы бафтыд.
Золойты Мæирбеджы залы дуæрттæ се ппæтæн дæр гом сты. Уый у тренеры политикæ. Йæ царды фылдæр хай снывонд кодта армрестлингæн. Бындур сæвæрдта спортивон династийæн. Сгуыхт тренер схъомыл кодта дунейы 50 чемпионæй фылдæр. Республикæйы армспорт ракодта ног æмвæзадмæ. Архайы, йе нæниздзинад хъыгдард кæмæн у, уыдонимæ дæр.
Золойты Мæирбег, РЦИ-А иугонд командæйы хистæр тренер армрестлингæй: «Армæйхæцджытæ сæхи тынг хорз равдыстой. Алы хатт дæр куы ацæуæм, уæд республикæйы фæсивæд сæхи февдисынц æгъдауджынæй. Хорз фæсивæд нæм ис. Уый фæрцы райстам фыццаг бынат. Сæхи рæсугъд равдыстой нæ фæсивæд, сты тыхджын. Семæ кусын хъæуы. Æмæ нæм уыдзæн хорз фæсивæд».
Армрестлингы къухты хъару æнæмæнг ахсджиаг у, фæлæ ма хъæуы æндæр миниуджытæ дæр. Уæлахизмæ фæндагыл æдзух зæрдыл дарын хъæуы раст техникæ æмæ тагъддзинад. Уæвгæ, цæгатирыстойнаг спортсментæ уæлахизтыл ахуыр сты. Уæрæсейы ивгъуыд чемпионаты республикæйы иугонд командæ сси хуыздæр иумæйаг хыгъды, рамбылдта æппæтæй фылдæр майдантæ. Лидерты *хсæн – Цереккаты Роман, Дыгуры Сæрмæт, Золойты Хадзымурат. Фæлтæрдджын спортсменкæ Хъаирты Мæдинæ арæх командæйæн æрхæссы сыгъзæрин майдантæ. Бæрзонд хатдзæгтæ равдыстой, ацы аз хистæрты *хсæн фыццаг хатт чи ерыс кодта, уыцы æрыгон спортсментæ дæр.
Цъæхилты Таймураз, РЦИ-А армспорты Федерацийы президент: «Æрæджы мах ссыдыстæм ерыстæй. 6 спортсмены райстой сыгъзæрин майдантæ. Ацы аз дзæбæх рахæцыдысты нæ фæсивæд. Сæ цæрæнбон бирæ, чи сæ сахуыр кодта, уыдонæн».
Ныртæккæ спортсментæ райдыдтой цæттæ кæнын Еналдыты Аслæнбеджы æппæтуæрæсеон номарæн турнирмæ. Ерыстæ уыдзысты июны кæрон. Уæлахиздзаутæн лæвæрд æрцæудзæн спорты мастеры кадджын ном.
