Сси Уæрæсейы чемпионкæ, æмæ бацыд нæ бæстæйы иугонд командæйы хыгъдмæ
Цæгат Ирыстоны сылгоймæгты æфсæддон самбойы историйы фæзынд ног ном – Мæхъиты Кристинæ. Сси Уæрæсейы чемпионкæ, æмæ бацыд нæ бæстæйы иугонд командæйы хыгъдмæ. Спортивон æнтыстдзинæдтæм фæндаг ын райдыдта 3 азы размæ. Разæй та ног нысан – дунейы чемпионат рамбулын. æрыгон спортсменкæйы тыххæй радзурдзæн Чехойты Фатимæ.
Ацы залы ацыдысты тренировкæты мин сахаты. Мæхъиты Кристинæ ам йæхи цæттæ кодта йæ сæйраг ерысмæ. Йæ ном Ирыстоны сылгоймæгты æфсæддон самбойы историйы у фыццаг. Стыр спортмæ фæндаг райдыдта джиу-джитсуйæ. Спорты мастеры ном, турнирты уæлахизтæ. æртæ азы размæ æрбацыд самбомæ. Тренировкæтæн æмæ рæдыдтытыл куыстæн ис хорз хатдзæг – Уæрæсейы чемпионаты уæлахиз, стæй бынат бæстæйы иугонд командæйы. Кристинæйæн уый æнтыст нæу, фæлæ йæхиуыл куысты бæрæггæнæн. Спортсменкæйы ныхæстæм гæсгæ йын уæлахиз æрмæст сæрыстырдзинад нæ балæвар кодта, фæлæ – хи рæдыдтыты æмбарынад æмæ йæ дарддæры архайды бæлвырд фæтк. Фидæнмæ та йæ зæрдæйы – ног нысантæ æмæ æнтыстытæ .
Кристинæйы уæлахиз æхсызгон у тренер Козаты Аланæн. У сæ иумæйаг егъау куысты хатдзæг. Чемпионатмæ цæттæ кодтой Рязаны. Тынг æххуыс уыд, спорты архайды фæлтæрддзинад кæй ис, уый. Самбомæ æрбацыд цæттæйæ. Уый руаджы йын фыццаг рæстæг дæр уыдис хорз бæрæггæнæнтæ. Тренер куыд зæгъы, уымæ гæсгæ спортсменты чызджытыл æмæ лæппутыл нæ дих кæны. Гауызыл се *ппæтмæ дæр ис иухуызон домæнтæ.
Кристинæйæн стыр æххуыс бакодта Козырты Соломон. Тренировкæтæ иумæ рагæй кæнынц. Ерысты дæр иумæ архайдтой, уæлахизыл цин дæр сын уыд иумæйаг. Спортсментæн Кристинæимæ ис хъæрмуд ахастытæ. Зæгъынц, зæрдæхæлар чызг у, зæгъгæ, фæлæ гауызыл равдисы йæ фидар удыхъæды миниуджытæ. Уыдоны руаджы йын бантыст стыр уæлахиз.
Уæрæсейы чемпионаты уæлахизы фæстæ Кристинæ йæ фæллад нæ уадзы. Дарддæр кæны тренировкæтæ – йæхи цæттæ кæны Сомихы цы дунейы чемпионат ацæудзæн, уымæ.
