Амыдта йæ хицауады сæрдар Тускъаты Таймураз
Цæгат Ирыстоны территорийы ног инфекцион дзæбæхгæнæн-диагностикон корпус саразыныл ныхас цыд кусæг къорды æмбырды. Амыдта йæ хицауады сæрдар Тускъаты Таймураз. Стыр æргом дзы аздæхтой нæ регионы социалон инфраструктурæйы объектты арæзтадмæ. Видеоконференцийы архайдтой хицауады уæнгтæ æмæ муниципалон скондты сæргълæуджытæ. Республикæйы тагъд æххуысы клиникон рынчындоны инфекцион корпус арæзт æрцыд ивгъуыд æнусы 60-йæм азты, æмæ ныр дзуапп нал дæтты санитарон-эпидемиологон, зынгсирвæзтыты ныхмæ æмæ арæзтадон домæнтæн. Ис дзы 90 бынаты, фæлæ дзы нæй, бокстæ кæй хонынц, ахæм палатæтæ. Уымæ гæсгæ æнæмæнг хъæуы нырыккон бæстыхай саразын. Афтæмæй фæхуыздæр уыдзæн лæггæдты хæрзхъæддзинад дæр. Ныртæккæ куыст цæуы проектон-сметон документацийыл. Æнæниздзинадхъахъхъæнынады министрад æмæ Дзæуджыхъæуы администраци арæзтадæн иумæ агурынц зæххы хай, æмæ бахынцын хъæудзæн цалдæр домæны, загъта Тускъаты Таймураз. Ацы аз цы медицинон объекттæ арæзт цæуынц, уыдоны хсæн ис 36 фельдшерон-акушерон пункты. Сæ иумæйаг аргъ у 219 милуан сомæй фылдæр. Уымæй дарддæр нæ территорийы аразынц 120 социалон объекты. Се ппæт дæр царды рацæудзысты паддзахадон программæтæ æмæ национ проекттæ æххæст кæнгæйæ. Ацы аз социалон-экономикон рæзты фарстатæ алыг кæнынæн радих кæндзысты 17 миллиард сомæй фылдæр. Иумæйаг бюджет уыдзæн 7 миллиарды æмæ 900 милуан сомы. Уый, 2019-æм азимæ абаргæйæ, у фылдæр.
