Арæзт æрцæудзæн 1-æмæй – 7-æм мартъийы онг Сочийы федералон территори «Сириус»-ы
Цæгат Ирыстоны цæттæ кæнынц фæсивæды Æппæтдунеон фестивальмæ. Арæзт æрцæудзæн 1-æмæй – 7-æм мартъийы онг Сочийы федералон территори «Сириус»-ы. Регионалон организацион комитеты æмбырд амыдта Хицауады Сæрдар Дзанайты Барис. Фæсивæды хъуыддæгты Комитеты разамонæг Джусойты Руслан куыд фехъусын кодта, афтæмæй егъау мадзалы бацархайыны тыххæй курдиæттæ балæвæрдтой нæ республикæйы 845 минæвары. Цæуы сыл 14 азæй 35 азы онг. Уыимæ квотæ та ис 90 адæймагæн. Сæйраг делегацийы хыгъд сæбæрг уыдзæн сæрмагонд æвзарæн куысты хатдзæгтæм гæсгæ. Уымæй дарддæр ма фæсивæды Æппæтдунеон фестивальмæ ацæудзæн 14 бархионы дæр. Уыдон æххуыс кæндзысты фестиваль аразыны цæттæгæнæн мадзæлтты. Семæ уыдзысты республикæйы сфæлдыстадон коллективтæ. Афтæмæй егъау фæсивæдон мадзалы Цæгат Ирыстонæй уыдзæн 150 адæймаджы. Фестивалы программæйы уыдзæн регионалон программæ дæр. Фæсарæйнаг уазджыты хондзысты Уæрæсемæ. Уыимæ нæ республикæмæ дæр фæсарæйнаг бæстæтæй уазæгуаты æрбацæудзысты 40 адæймаджы. Фæсивæды хъуыддæгты Комитет дзуапп дæтдзæн культурон программæйæн. Профилон ведомствотимæ бакусдзысты 4 боны пъланыл. Дзанайты Барисы амындмæ гæсгæ, хъæуы делегацийы уæнгты фембæлдтытыл æмæ экскурсион балцытыл бакусын. Хъуамæ уазджытæ бæстон базонгæ уой нæ регионы культурæимæ æмæ традицитимæ. Фембæлдзысты республикæйы сæргълæууæг Сергей Меняйлоимæ æмæ фестивалы фæсарæйнаг делегаттимæ. Зæгъдзыстæм ма уый дæр, æмæ фæсивæды Æппæтуæрæсеон фестиваль арæзт æрцæудзæн Уæрæсейы Президент Владимир Путины Указмæ гæсгæ. Мадзалы сæйраг нысан – æппæтадæмон фæсивæдон æмгуыстадыл архайын. «Сириус»-ы фембæлдзысты 20 мин уæрæсейаг æмæ фæсарæйнаг минæвары: бизнесæй, медиа къабазæй, культурæйæ, наукæйæ, ахуырадæй, волонтерты æмæ хæрзаудæн змæлдæй, спортæй æмæ афтæ дарддæр.