Уый фæрцы хъуамæ лыггонд æрцæуа полигонты бырæттæ æмбырд кæныны фарста
Цæгат Ирыстоны цæттæ кæнынц хъæбæр коммуналон хауæтдзæгтæ чи кусдзæн, ахæм ног завод скусын кæнынмæ. Уый фæрцы хъуамæ лыггонд æрцæуа полигонты бырæттæ æмбырд кæныны фарста. Куыстуатæн йæ бон уыдзæн афæдзмæ 100 мин тоннæйы онг бырæттæ æвзарын. Завод байгом кæнын фæнд кæнынц азы кæронмæ. Бæлвырддæр радзурдзæн Хъайтмазты Дзерассæ.
Æрдзæн зиан чи нæ хæссы, ахæм нырыккон технологитæ. Афтæ зæгъæн ис хъæбæр коммуналон хауæтдзæгтыл бакуысты ног заводы тыххæй. Ам сарæзтой æппæт уавæртæ горæты сæйрагдæр экологон фарстатæй иу алыг кæнынæн. Фыццаг бырæттæласæн машинæтæ заводы территорийы цæудзысты радиацион æмæ уæз бæлвырдгæнæн мадзæлттæ, уый фæстæ хауæтдзæгтæ ласдзысты комплексмæ.
Æвзарæн линийæн йæ бон азмæ уыдзæн 100 мин тоннæйы онг хауæтдзæгтæ уадзын. Пайдайаг фракцитæ æмбырд кæндзысты цалдæр секцийы сæ категоримæ гæсгæ. Иннæ бырон та æрвитдзысты ныгæнынмæ. Уыцы нысанæн полигоны радих кæндзысты 3 фæзы. Фыццаг ныридæгæн цæттæ у.
БАМ-ы цæрджытæ фыццаг аз нæ хъаст кæнынц, бырондонæй цы æвзæр тæф цæуы, уый сæ кæй тыхсын кæны, уымæй. Регионалон оператор «Эра»-йы кусджытæ куыд зæгъынц, афтæмæй гæнæн ис, æмæ уый цæуы зæронд рекультивацион полигонæй. Сæхгæдтой йæ 2020-æм азы, фæлæ ныры онг карз тæф цæуы. 5 бæлвырдгæнæн уаццаджы барынц мæры æмæ уæлдæфы чъизидзинады æмвæзад. Иртæстыты хатдзæгтæм гæсгæ, фæстаг 2 азмæ чъизигæнæн буаргъæдты концентраци ам æмбæлгæ нысаниуæгтæй бæрзонддæр нæу. Фæстаг хатт пробæтæ систой майы.
Завод байгом кæнын фæнд кæнынц азы кæронмæ.
