Уæлахиздзау суæвыныл архайынц 100 æвзонг спортсменкæйæ фылдæр, нæ бæстæйы алы регионтæй
Цæгат Ирыстоны цæуынц, легендарон советон спортсменкæ, æртæ хатты олимпаг чемпионкæ Галина Гороховайы призтæ рамбулыны, 7-æм Æппæтуæрæсеон ерыстæ фехтованийæ. Уæлахиздзау суæвыныл архайынц 100 æвзонг спортсменкæйæ фылдæр, нæ бæстæйы алы регионтæй. Бæстондæр радзурдзæн Чехойты Фатимæ.
Хъæбысхæсты спортивон цæттæдзинады Центры — ахсджиаг цау: 7-æм Æппæтуæрæсеон ерыстæ фехтованийæ Советон Цæдисы спорты сгуыхт мастер, Советон Цæдисы æмæ УФ-йы сгуыхт тренер, 3 хатты олимпаг чемпионкæ æмæ дунейы 9 хатты чемпионкæ Галина Гороховайы кадæн. Дæсныйад æмæ змæлды аивдзинад ам сты хъысмæт аразæг. Ацы турниры архайд алкæмæндæр — стыр кад.
Хуыздæр суæвыныл ерыс кæнынц 100 архайæджы 14 азæй 18 азы онг кæуыл цæуы, ахæмтæ. Сты Уæрæсейы алы рæттæй: Стъараполæй, Кæсæг-Балхъарæй, Адыгейæ, Самарæйæ æмæ Дзæуджыхъæуæй. Стъараполæй Вера Дублина амæй размæ йæ тыхтæ фæлвæрдта Мæскуыйы ерысты. Йæ ныхæстæм гæсгæ, Цæгат Ирыстоны турнир йæ зæрдæмæ тынгдæр цæуы.
Верæ фехтованимæ цæуы 4 азы. Спортивон секцимæ æрбацыдис, иннæ сывæллæтты хуызæн, хъæугæ сахат йæхи бахъахъхъæнын йæ бон куыд суа, ахæм фæлтæрдтæ базонынæн, фæлæ ам баззадис.
Ерысты архайджыты фарсмæ — сæ тренертæ. Уæлахизтæм уыдон сразæнгард кæнынц сæ хъомылгæнинæгты. Сæ цæст сæм фæдарынц суанг турнирты кæронмæ.
Галина Горохова ацы ерысты Цæгат Ирыстоны æдзухдæр вæййы. Стыр аргъ кæны фехтованийы бынæттон скъолайæн.
Уæлахиздзаутæ æмæ призертæ райсдзысты Галина Гороховайы лæвæрттæ. Турнир æххæст кæны паддзахадон программæ «Уæрæсейы спорт»-ы хæстæ. Уыдон та сты — активон царды хуыз парахат кæнын, рæзгæ фæлтæры æнæниз цардыуагмæ æмхиц кæнын, стæй алыхуызон секцитæм чи цæуы, уыдоны нымæц фылдæр кæнын.
Уæнгты рæсугъд айст, тагъд змæлд æмæ уæлахизмæ тырнындзинад кæддæр Галина Гороховайы систой Олимпмæ, ныр та уыцы æууæлтæ *вдисынц ерысты архайджытæ. Æмæ чи зоны, уыдонæн дæр бантысдзæн сæ уарзон спорты хуызы стыр бæрзæндтæм схизын.
