Ахуыргæнæндоны æдзухдæр кусынц, алы къабæзты ахсджиаг чи уыдзæн, ахæм проекттыл
Цæгат Кавказы хæххон-металлургон институт нымад у республикæйы раззагдæр наукон центртæй иуыл. Ахуыргæнæндоны æдзухдæр кусынц, алы къабæзты ахсджиаг чи уыдзæн, ахæм проекттыл. Студенттæ ныридæгæн пайда хæссынц бæстæйæн энергетикæйы æмæ хæххон-амалгæнæн промышленносты къабæзты. Æрыгон ахуыргæндты цымыдисаг проектты тыххæй радзурдзæн Хъайтмазты Дзерассæ.
Цæгат Кавказы хæххон-металлургон институты 4-æм курсы студенткæ Екатерина Лопушняк йæ наукон разамонæгимæ бакуыста зæххыбын шахтæты 3Д модельтæ аразыны проектыл. Нымæцон къопи хæххон куыстуæттæн дæтты, зæронд æрзæткъахæнты уавæр сбæрæг кæныны, ногтæн та бынæттæ проект кæныны фадат. Уый фæрцы компьютеры мониторыл фенæн ис, æрзæткъахæнты алы хæйтты хæххон мыггæгтæй цал проценты ис, уый. Программæ куыстуæттæн æххуыс кæндзæн ахадгæдæрæй архайын. Технологийы руаджы стыр фæрæзтæ фæстауæрцгонд цæудзысты. Уæвгæ, дзы ныридæгæн пайда кæнынц Норильскы егъау хæххон куыстуаты.
Екатеринæ ма бакуыста хæххон куыстуæтты вентиляцион шахтæты энерги фæстауæрц кæныны системæйыл дæр. Йæ мидис у, адæм кæнæ техникæ кæм кусынц, уыцы бынæтты уæлдæф ахадгæдæрæй уарын. Зианхæссæг газты бæрц нормæйæ фылдæр куы уа, уæд нейронон хыз йæхæдæг кусын кæндзæн вентиляци. Уый фæрцы куыстуæттæ электрон тых фæстауæрц кæндзысты 50 проценты онг.
Институты æрыгон ахуыргæндтæм ис бирæ цымыдисаг хъуыдытæ. Вадим Силаевы бакуыстытæ баст сты республикæ энергийæ æххæст кæнынимæ. Проекттæй иумæ гæсгæ хæххон рæтты æвæрд цæудзысты хуры панельтæ. Вадим куыд загъта, афтæмæй хæхты климат ацы нысантæн хорз бæззы. Хуры батареятæ ныридæгæн бафæлвæрдта институты бындурыл.
Вадим Силаевæн ма цымыдисаг у альтернативон, стæй атомон энергетикæйы райрæзт. Ис æм бæлвырд хъуыдытæ ацы къабазы дæр. Проект нырма гæххæттыл ис, фæлæ Вадим агуры ацы стыр проект сæххæст кæнынæн æмбæлтты.
