Фæсивæдæн фадат уыд, Фыдыбæстæйы Стыр хæсты тыххæй постановкæмæ фыццаг хатт бакæсынæн, æмæ историон æцæгдзинадимæ базонгæ уæвынæн
Цæгат Кавказы суворовон æфсæддон училищæйы хъомылгæнинæгтæ Уырыссаг Академион театры федтой спектакль «Эшелон». Фæсивæдæн фадат уыд, Фыдыбæстæйы Стыр хæсты тыххæй постановкæмæ фыццаг хатт бакæсынæн, æмæ историон æцæгдзинадимæ базонгæ уæвынæн. æрыгон театрдзауты балцы тыххæй радзурдзæн Чехойты Фатимæ.
Ам декорацитæ – вагоны тамбур, театрдзауты зал та – бынтон хæстæг хъайтартæм. Фыдыбæстæйы Стыр хæсты тыххæй спектакль фыццаг хатт федта Суворовон училищæйы 9-æм къласон Савва Попандопуло. Амæй размæ ма театры уыдис, фæлæ-иу уæд бакаст классикон жанры постановкæтæм.
Академион Уырыссаг театры чысыл сценæйы Михаил Рощины пьесæмæ гæсгæ – «Эшелон». Хæст, йæ цард кæмæн фехæлдта æмæ эвакуцигонд чи *рцыд, ахæм хуымæтæг адæмы тыххæй истори. Се *хсæн – сылгоймæгтæ æмæ сывæллæттæ. Вагон сын сси æнхъæлмæ кæсыны æмæ цардыл тох кæныны бынат.
Историйы ахсджиаг æрмæст æфсæддон цаутæ не сты. Уарзын, тæригъæд кæнын, ныфс дæттын – хъайтарты хъысмæтæй спектакль æвдисы адæймаджы хуыздæр миниуджытæ. Ацы хæзнатæн сæ мидис нæ ивы ныр дæр.
Спектакльмæ бакастысты Цæгат Кавказы суворовон æфсæддон училищæйы хъомылгæнинæгтæ. Лæппутæн уыдис хорз фадат историон цаутæ æрмæст чингуытæй базонын нæ, фæлæ сценикон архайды руаджы.
Истори фыст æрцыд дæсгай азты размæ, ныр та ногæй зæлы сценæйæ, театрдзаутæм бынтон хæстæг. Уæвæн ис, æмæ уыцы хæстæгдзинады фæрцы ивгъуыд свæййы æмбæрстгонддæр, йемæ баст мысинæгтæ та баххæст кæны сæрмагонд тыхæй.
