Ацы хатт ахуыргæнæндоны рæнхъытæ баххæст кодтой 78 курсанты
Цæгат Кавказы Суворвон училищæйы райдыдта ног ахуыры аз. Ацы хатт ахуыргæнæндоны рæнхъытæ баххæст кодтой 78 курсанты. Уымæй дарддæр ма сæрмагонд бадзырды фæрцы ацы аз Суворовон училищæмæ ахуыр кæнынмæ бацыдысты 5 лæппуйы Хуссар Ирыстонæй.
Афтæмæй, Хуссар æфсæддон зылды æфсæдты командæгæнæджы хæстæ рæстæгмæ æххæстгæнæнæг Алексей Авдеевы ныхасæй азæлыд фыццаг дзæнгæрæг. Æвзонг курсант Андрей Самков ацы аз бацыд Цæгат – Кавказы æфсæддон училищайы 5-æм къласмæ. Йæ ныхæстæм гæсгæ рагæй бæллыд ацы ахуыргæнæндоны кæртæй бахизынмæ, ныр йæ бæллиц йæ къухы бафтыд. Йæ фыд Алексей Самков дæр у æфсæддон. Цыппар мæйы дæргъы архайы сæрмагонд æфсæддон операцийы. Уæрæсейы уæлахизмæ æвæрæн хæссы. Андрей куыд зæгъы, уымæ гæсгæ, карзæй йæ фæнды ахуыры фæстæ æфсæддон суæвын, цы къабазы, уый дæр зоны.
Ацы аз Суворовон училищæйы фæндзæм къласы курсанттæ систы 78 лæппуйы. 21 –æн сæ ныййарджытæ сты сæрмагонд æфсæддон операцийы бынаты. Ис дзы Хуссар Ирыстонæй дæр фондз ахуырдзауы. Кадджын мадзалы архайдтой фидæны фыдыбæстæ хъахъхъæнджыты хиуæттæ, зонгæтæ, хиуæттæ.
Кадджын уазджыты хсæн уыдысты, Дзæуджыхъæуы муниципалон сконды сæргълæууæг Александр Пациорин, училищæйы рауагъдон, стæй Хуссар æфсæддон зылды æфсæдты командæгæнæджы хæстæ рæстæгмæ æххæстгæнæнæг Алексей Авдеев.
Кадджын маршы фæстæ суворовонтæ бацыдысты сæ кабинеттæм. Разæй сæм æнхъæлмæ кæсы æнæхъæн ахуырадон афæдз. Кæмæндæр суыдзæн йæ фыццаг, чидæртæ та сæхи цæттæ кæнынц æнтысджын рауагъдонтæ суæвынмæ. Алчи дæр дзы райдзаст æнкъарæнтимæ мысдзæн, ам цы рæстæг æрвитынц, уый.
