Ахæм аргъ ын скодтой, йæ æнæрлæугæ фæллойадон стаж 60 азæй фылдæр кæй у, уый тыххæй
Æнусы рдæгæй фылдæр лæггад кæны йæ равзæрст дæсныйадæн … Цæгатирыстойнаг педагог Мæргъиты Раисæйы ном хаст æрцыд Уæрæсейы рекордты чиныгмæ. Ахæм аргъ ын скодтой, йæ æнæрлæугæ фæллойадон стаж 60 азæй фылдæр кæй у, уый тыххæй. Сылгоймаг хъомылгæнæгæй кусы Михайловскæйы 21-æм рæвдауæндоны. Уæздан æмæ цæстуарзон сылгоймаджы тыххæй бæстондæр нæ дарддæры æрмæджы.
Алы сывæллоны зæрдæмæ дæр фæндаг ссарын. Мæргъиты Раисæ рæвдауæндоны кусы 61 аз. Æмæ уыцы рæстæгмæ схъомыл кодта сæдæгай сывæллоны. Куыд зæгъы, афтæмæй йæ дæсныйады æппæтæй зындæр у, йæ бæрны цы сывæллæттæ уыд, уыдонимæ фæхицæн уæвын. Ныры рæстæг сывæллæтты хсæн интернет æмæ телефоны хъæзтытæ ахадгæ кæй сты, уый нæ хынцгæйæ, Раисæйæн йæ бон æнцонæй у сывæллоны сцымыдис кæнын.
Мæргъиты Раисæ æвзонг æмкусджытæн у зондамонæг æмæ дæнцæгæн хæссинаг. Æххуыс кæй бахъæуы, уымæн йæ зонындзинæдтæ æнæвгъауæй балæвар кæны. Йæ куысты биографийы ис æрмæстдæр иу фыст. Рæвдауæндон сси йæ фыццаг æмæ иунæг куысты бынат. Нæ фæразы сывæллоны кæуынæн. Æмæ сабиты цæссыг хъазты хуызы расайы мидбылхудтмæ.
Уæздан, хиуылхæцт æмæ цæстуарзон сылгоймаг æнхъæл дæр нæ уыд, Уæрæсейы рекордты чиныгмæ йæ ном хаст кæй æрцæудзæн, уый. Раисæ фыццаг сси номинаци «сывæллæтты рæвдауæндоны æнæрлæугæ фæллойадон стаж»-ы. Йæхæдæг куыд зæгъы, афтæмæй йын йæ куыстæн ахæм аргъ кæй скодтой, уый йын тынг æхсызгон у.
Уыцы фарстæн дзуапп раттын йæ бон у Раисæйæн. Æмæ уыцы дзуапп уыдзæн хæрзхуымæтæг – уарзы сывæллæттимæ кусын. Куысты рæстæг ын цы зындзинæдтæ сæвзæры, уыдон та аиуварс кæны йæ дæсныйадмæ уарзондзинады руаджы. Мæргъиты Раисæ ссардта йæ зæрдæйæн уарзон куыст, æмæ уыцы куыст кæны æнусы рдæгæй фылдæр.
