Сæ разамонæг Лолаты Батраз сæм, йæ бон куыд у, афтæмæй базилы, фæлæ уыцы аивгæнæн куыстытæ фаг не сты
Цæголты Георгийы номыл хæдзар-музейы, стæй Дыгуры районы историйы музейы бæстыхæйттæ 60 азмæ æрцыдысты кæлæддзаг уавæрмæ. Сæ разамонæг Лолаты Батраз сæм, йæ бон куыд у, афтæмæй базилы, фæлæ уыцы аивгæнæн куыстытæ фаг не сты. Цæгат Ирыстоны Национ музейы æппæт лыггæнинаг фарстаты тыххæй зонынц, æмæ зæрдæ æвæрынц баххуыс кæнынæй.
Мидхæсты рæстæгæй пулемет æвдисæн у уæды рæстæджы карз тохтæн. Хæцæнгарз у Цæголты Георгийы номыл музейы ахсджиагдæр экспонаттæй иу. Йæ фарсмæ та Дыгургомы æрдзы нывтæ. Уым уыцы азты бынæттон цæрджытæ сæ зæххытæ хъахъхъæдтой урсгвардион инæлар Шкуройæ. Ныр 60 азæй фылдæр, музейы бындурæвæрджытæй иу – Лолаты Батраз цæстыгагуыйау хъахъхъæны уыцы цауты тыххæй истори. Уæлдай æргом здахы зындгонд революционер – парти «Кермен»-ы комитеты разамонæджы царды хабæрттæм.
60 азмæ дыууæ бæстыхайы дæр, ома Цæголты Георгийы номыл хæдзар-музей, стæй Дыгуры районы историйы музей æрцыдысты кæлæддзаг уавæрмæ. Лолаты Батраз сæм, йæ бон куыд у, афтæмæй базилы, фæлæ уыцы аивгæнæн куыстытæ фаг не сты.
Спонсорты æххуысы фæрцы ныридæгæн бантыст музейы цалдæр залы сцалцæг кæнын. Баивтой пъолтæ стæй хъармгæнæн системæ. Уæдæ ма сæ бон баци бæстыхайы сæр баивын дæр, цæмæй экспонаттæ хъахъхъæд æрцæуой, уый тыххæй.
Лолаты Батраз ма фæнд кæны залты хуыз аивын дæр. Зæгъæм, йæ хъуыдымæ гæсгæ дзы хъуамæ фæзыной интерактивон фæйнæджытæ. Уымæн та хъæуы æппæт цалцæггæнæн куыстытæ фæуын. Уыдон та сты дзæвгар. Цæгат Ирыстоны Национ музейы æппæт лыггæнинаг фарстаты тыххæй зонынц. Уымæн æмæ Цæголты Георгийы номыл музей у йæ филиалтæй иу.
Уæвгæ та Национ музейæн республикæйы ис 12 филиалы. Ныртæккæ цалцæггæнæн куыстытæ кæронмæ фæхæццæ кæнынц Нары, Хетæгкаты Къостайы хæдзар-музейы. Уымæй дарддæр цалцæг райдыдта ирон литературæйы музейы Дзæуджыхъæуы. Афтæмæй, фидарæй зæгъæн ис уый, æмæ Дигорайы Цæголты Георгийы номыл музей дæр æнхъæлмæ кæй кæсы хуыздæрырдæм ивддзинæдтæм.
