Сæ сæйраг нысан — альпинизмы бындуртæ сфæлхат кæнын
Цъæйы кæронмæ фæхæццæ кæны Уæрæсейы Æнæнхъæлæджы уавæрты министрады ирвæзынгæнджыты иуæмйаг æмбырдтæ. Сæ сæйраг нысан — альпинизмы бындуртæ сфæлхат кæнын. Æдæппæтæй уыдзæн æртæ къæпхæны. Специалисттæ сæхи фæлварынц хæххон уавæрты ирвæзынгæнæн куыст кæнынæй. Æмбырды архайджытæ практикон ахуырты рæстæг ацæуынц ихын маршруттыл, ахизынц хæххон цæугæдæтты сæрты, саразынц фæдзæхстадон станцæтæ. Уымæй дарддæр хъыгдардбаййафджытæн бакæнынц фыццаг медицинон æххуыс. Програмæмæ хауынц теоретикон зонындзинæдтæ альпинистон, медицинон æмæ психологон цæттæдзинадæй. Фыццæгæм къласы ирвæзынгæнæг Екатеринбургæй Сергей Ткачев Цæгат Ирыстоны ис дыккаг хатт. Йæхæдæг куыд зæгъы, афтæмæй ахæм æмбырдтæ сты тынг ахсджиаг. Сæйрагдæр — алы регионты минæвæрттæ базонгæ вæййынц кæрæдзийы фæлтæрддзинадимæ. Инструктортæ иттæг хорз бамбарын кæнынц хæххон уавæрты куысты æппæт ахсджиаг хъуыддæгтæ. Иннæмæй та цымыдисаг вæййы базонын, иннæ отрядты ирвæзынгæнджытæ куыд кусынц, уый. Ахæм фæлтæрддзинад æнæмæнг хъæугæ у алы специалистæн. Уымæ æмæ йе ххуыс бацагурыны бон у Уæрæсейы алы регионы дæр, — зæгъы Æппæтуæрæсеон æмбырдты сæйраг тренер Галина Новоселова. Тренировкæтæ цæуынц алы зындзинады къæпхæнты маршруттыл. Цы хатдзæгтæ равдисой, уымæ гæсгæ сæ бон уыдзæн альпинизмæй дыккаг спортивон разряд райсын. Иугонд æмбырдты æртыккаг фæлтæр райдайдзæн 5-æм августы.
