Уыцы куыст сæ къухы æнтыстджынæй бафтыд
Ног ахуыры аз – ног гæнæнтимæ. Цалдæр азы размæ Цæгат Ирыстоны медицинон колледж райста паддзахадон грант кабинеттæм базилынæн æмæ нырыккон кусæнгæрзтæ самал кæнынæн. Уыцы куыст сæ къухы æнтыстджынæй бафтыд. Уый фæрцы студенттæн фадат ис сæ фæлтæрддзинадыл æфтауынæн æмæ хи лабораториты архайынæн. Уымæй дарддæр ма колледжæн йæ бон у профессиолналон конкурстæ аразын дæр.
Ацы бонты Цæгат Ирыстоны медицинон колледжы байгом кодтой 3 æрмадзы. Уыдоны студенттæ сæхи æнкъарынц ахуыргæнæн аудиториты нæ, фæлæ цыма раст æцæг реанимацион хайады сты, афтæ. Нырыккон кусæнгæрзтæ, манекентæ, сæрмагонд медицинон уæлæдарæс. Алцыдæр æцæг уавæрты хуызæн. Медицинон æмæ социалон æркасты кабинеттæ, лабораторон анализ, реанимацион хайад æмæ акушерон хъуыддаг. Колледжы директор Реуазты Таймураз равдыста модернизацигонд аудиторитæ. Байгом кæнын сæ бантыст, 2017-æм азы цы грант райстой, уый фæрцы. Куыстыты хæрзхъæддзинадæн аргъ скодта республикæйы ахуырады æмæ наукæйы министры хæдивæг Мæхъиты Людмилæ.
Уæвгæ, ног æрмадзтæ бакодтой ахуырадон организаци «Ворлд Скилз»-ы руаджы. Нæ республикæ уыцы программæйы архайы 2012 азæй фæстæмæ, медицинон колледж та дзы бацархайдта 2017 азы. Сæрмагонд æрмадзты фæрцы студенттæн фадат уыдзæн фыццаг курсæй фæстæмæ фæлтæрддзинад исынæн. Рауагъдонтæн та сæ бон æнцондæр уыдзæн куыст ссарын.
Кæй зæгъын æй хъæуы, ахæм æрмадзты студенттæ практикæтæ куы кæной, уæд нæ республикæйы медицинон лæггæдтæ дæр фæхуыздæр уыдзысты – зæгъынц ахуырады министрады. Колледжы нырмæ уыд дыууæ æрмадзы. Ныр та ма дзы фæзынд акушерон куыст дæр.
Æрмадзтæ ифтонг сты нырыккон аппаратурæйæ. Кусæн дзы ис куыд студенттæн, афтæ се нæниздзинад хъыгдард кæмæн у, уыцы адæмæн дæр. Уый та уæлдай æхсызгон у.
Кæй зæгъын æй хъæуы, ныр ахуыргæнджытæн дæр æмæ студенттæн дæр зынгæ фенцондæр уыдзæн.
Нырыккон æрмадзты фæрцы ма Цæгат Ирыстоны медицинон колледж, зæгъæн ис, æмæ сси æххæстбарджын фæз Worldskills-ы коонкурстæ аразынæн. 2023-æм азы ам нысан кæнынц ног æрмадзтæ байгом кæнын. Уый фæрцы та фæфылдæр уыдзысты дисциплинæтæ.
