Дыууæ къуырийы дæргъы фæсивæд цы ахуыртæ ацæудзысты, уыдон сын ратдзысты фаг зонындзинæдтæ, цæмæй сывæллæттæн робототехникæ амоной
Математикæйы ахадындзинад программæтæ аразыны хъуыддаджы. Куыд пайда кæнынц бæлвырд наукæйæ робототехникæйы, æмæ цавæр профессионалон рæзт ис уæлæмхасæн ахуырады? Ацы фæрстытæн бæлвырд дзуæппытæ исынц Цæгат Ирыстоны паддзахадон университеты математикæйы æмæ компьютерон наукæты факультеты ахуырдзаутæ сæрдыгон практикæйы рæстæг «Кванториумы».
Математикон факультеты фыццæгæм курсы ахуырдзаутæ ерыс кæнынц, кæй стратеги сæ хъомысджындæр рауад, ууыл. Лабиринтыл ацæуын фыццаг бакастæй æнцон у. Фæлæ уый макæй фæсайæд. Роботтæн сæрмагонд программæ саразын алкæйы къухы нæ бафтдзæн. Ацы ерысты рамбулдзæн, æппæты фылдæр ацæуын кæй роботæн йæ бон бауа, уый. Цæболты Станиславы командæйæн сæ фыццаг хъавд нæ фæрæстмæ. Сæ роботмæ хъæуы бæлвырддæр базилын.
Ныртæккæ Стас у Цæгат Ирыстоны паддзахадон университеты студент, фæлæ уæддæр «Кванториумыл» тынг æнувыд у. Скъоладзау ма куы уыдис, уæд технопарчы ахуыр кодта айти программæтæ аразыныл. Куыд зæгъы, афтæмæй робототехникæ йæхицæн нымайы ног къабазыл. Аминæ æмæ Сослан та сæ командæйы бæрæггæнæнтæй сты тынг разы. Уæдæ сæ сæрдыгон практикæ дæр сæхи фæндиаг у.
Дыккаг фæлтæрæны размæ ахуыргæнæг ивы быдыры сконд. Æппæт архайджытæн дæр ис уыцы иу фæтк æмæ уавæртæ. Фæлæ мультфильм «Лунтиккæй» робот ерыстæм афтæ дæр не сцæттæ. Фæндаг йæ райданæй йæ кæронмæ ацыдис æрмæстдæр командæ «Баварийы» робот.
Ныртæккæ «Кванториумы» практикæ цæуынц дыууын авд студенты. Уыдон скодтой æртындæс командæйы. Цы зонындзинæдтæ райсынц, уыдон дыууæ бонæй дыууæ бонмæ фидар кæнынц ерысты. Ныртæккæ иуæндæс командæйы сæ тыхтæ æвзарынц ерысты æнцон хуызы. Иннæ дыууæ командæйы та сты, робототехникæйы стыр фæлтæрддзинад кæмæ ис, уыдон.
Дыууæ къуырийы дæргъы фæсивæд цы ахуыртæ ацæудзысты, уыдон сын ратдзысты фаг зонындзинæдтæ, цæмæй сывæллæттæн робототехникæ амоной. Кæй фæнда, уыдонæн та уыдзæнис гæнæн «Кванториумы» стажировкæ ацæуын.
